Nog adres

Политикæ/ …УÆД ЫН КЪАДДÆР ÆМДЗÆГЪД КОДТАИККОЙ

21-æм январы Гуырдзыстоны президент Михаил Саакашвили раныхас кодта Европæйы Парламентон Ассамблеяйы Советы сессийы. Куыд æрвылхатт, афтæ та ныр дæр Саакашвили æнæрастæй критикæ кодта Уæрæсе, Хуссар Ирыстон æмæ Абхазы æмæ та ногæй æрсидт «Гуырдзыстоны территориалон æнæхъæндзинад» сæндидзын кæнынмæ. Постконфликтон фарстатæ æрбæстон кæныны фæдыл РХИ-йы Президенты Æххæстбарджын минæвар Джиоты Мурат Саакашвилийы раныхас афтæ скомментари кодта:
- Михаил Саакашвили фыццаг хатт нæ раныхас кодта Европæйы Парламентон Ассамблеяйы Советы сессийы, фæлæ ацы хатт уый уыд паддзахады сæргълæууæджы æнахуыр миниуæгимæ - «президент, кæцы ис оппозицийы».

Фыццаг æмæ сæйраг фарста, кæцы хъуамæ фæзындаид æмæ, æвæццæгæн, фæзынд Европæйы Парламентон Ассамблеяйы Советы сессийы депутаттæм, зæгъгæ, уый цахæм паддзахад у, кæцыйы президент йæ раныхасы карзæй критикæ кодта бæстæйы премьер-министр æмæ йæ политикæйы.
Куыд ахуыр у, афтæмæй та нæ ахызт Хуссар Ирыстонимæ баст фарстаты фæрсты дæр, ногæй та йæ схуыдта оккупацигонд территори. Ногæй та фæаххосджын кодта Уæрæсейы «гуырдзиаг территориты оккупацийæ». Гуырдзыстоны хицауады сæргъы куы лæууыд нæдæр уæд æмæ нæдæр ныр, йæ ахасты Гуырдзыстоны арæхæй-арæхдæр куы хъуысынц «хæрзбон», зæгъгæ, Саакашвилийæн йæ бон нæу реалон уæвындзинад банымайын -Хуссар Ирыстон никуы уыд æмæ нæу Гуырдзыстоны, гуырдзиаг паддзахады иу хай, кæцыйы банымадта дунеон æмæхсæнад 1991 азы фæстæ. Уæрæсе Хуссар Ирыстонæн «оккупант» нæу, фæлæ - хæларадон бæстæ, кæцы йемæ аразы æмбар бадзырдон ахастытæ.
Уæрæсейаг депутатæн Саакашвили срекомендаци кодта кæсæнцæстытæ бакæнын, цæмæй фена «Гуырдзыстоны æцæг картæ», фæлæ уый, йæхæдæг дæр, æгæрыстæмæй, микроскопимæ дæр не ссардзæн барадон бындуртæ, Гуырдзыстоны постсоветон хицауады æмæ сæ фарсхæцджыты политикон фæндондзинады йедтæмæ, кæцыты тыххæй Хуссар Ирыстоны гæнæн уа Гуырдзыстоны хайыл банымайын.
Саакашвили æрвылхаттау бирæ дзырдта демократийы тыххæй, фæлæ уый цæй бæрзонд демократийы нысан у, кæд æмæ уый сиды, цæмæй ма банымайой Хуссар Ирыстон æмæ Абхазы адæмты сæрибар рæзты бартæ.
Æмæ ма зæгъдзынæн. Европæйы Парламентон Ассамблеяйы Совет иу хатт уæддæр куы фехъусид Хуссар Ирыстоны хъæлæс æмæ йын йæ минæвæртты куы фæхониккой депутатты раз хуссарирыстойнаг позициимæ раныхас кæнынмæ, уæд къаддæр æмдзæгъд кæниккой, «Гуырдзыстоны территориалон æнæхъæндзинады» тыххæй куы фехъусынц, уæд.