Nog adres

«КЪОНА» ГАСТРОЛТЫ УЫД ТУРЧЫ

kona_1.jpg
Ирон фæсивæдон фольклорон ансамбль «Къона»-йæн фесты Турчы йæ фыццаг гастролтæ. 12 январы музыканттæ концерт радтой Стамбулы клуб «Гаражистанбул»-ы æмæ 13 январы та Турчы столицæ Анкарайы, бынæттон хъæрæсейаг æхсæнады бæстыхайы.

Фæсивæдон фольклорон ансамбль «Къона» арæзт æрцыд 2011 азы ноябры Дзæуджыхъæуы. Йе сконды сты авд музыканты: Берозты Таймураз, Бестатуы Александр, Дзаболаты Вадим, Илаты Тимур, Тогойты Альберт æмæ Тотойты Олег, афтæ ма Тедеты Нати. Се сфæлдыстады фольклорон къорды хайадисджытæ, кæцытæ сæхи базонын кодтой Хуссар Ирыстоны дæр, рæзын кæнынц скифаг-сæрмæттаг музыкæ.
Зæронд мелодитæ æххæст кæныны рæстæджы «Къона»-йы музыканттæ пайда кæнынц адæмон инструменттæ - аккордеон, дзыхы фæндыр, дыу-уадæстæнон фæндыр, уадындз, хъиссынфæндыр, къæрццгæнæгæй.

Туркмæ «Къона»-йы къорды фæхуыдтой бынæттон ирон диаспорæйы активисттæ, сæрмагондæй, Албегты Лейлæ. Гастролтæ сорганизаци кæ-нынæн сын баххуыс кодта Кавказы адæмты национ дарæс хуыйыны фæдыл дæсны, Республикæ Цæгат Ирыстон-Аланийы культурæйы сгуыхт кусæг, кутюрье Годжыцаты Изольдæ.

Алыгъуызон бæрæггæнæтæм гæсгæ, Турчы территорийыл цæры 21-35 мин ироны, кавказаг мухаджирты фыдæлтæ, кæцыты Турчы иумиагæй хонынц «хъæрæсейæгтæ». 2008 азы августы туркаг ирæттæ Республикæ Хуссар Ирыстонимæ æмуддзинады нысанæн акцийы протесттæ уагътой Анкарайы Гуырдзыстоны минæварады цур æмæ Стамбул æмæ Измиры минæварадты цур. Афтæ гуманитарон æххуыс æрæрвыстой Хуссар Ирыстонмæ. 2012 азы 8 августы Цхинвалмæ æрцыд Турчы ирон диаспорæйы делегаци 4 адæймаджы скондæй, йæ сæргъ Албегты Лейлæ, афтæмæй.