Nog adres

ÆВÆРД ЦÆУЫНЦ ФÆНДАГОН НЫСÆНТТÆ, ФÆЛÆ РОХ КÆНЫН НÆ ХЪÆУЫ ФИСТÆГÆЙ ЦÆУДЖЫТЫ ДÆР

DSCN7482_4.JPG
Хуссар Ирыстоны Арæзтад æмæ архитектурæйы министрад кусы республикæйы автомобилон фæндæгты информацион фæндагон нысæнттæй сифтонг кæныныл. Арæзтад æмæ архитектурæйы министры хæдивæг Гаглойты Сергей куыд фехъусын кодта, афтæмæй ацы куыстытæ фесты Цхинвал - Знауыры сосæ фæндаг.
«Фæндагыл цæуыны нысæнттæ æвæрд цæуынц фæндагыл цæуыны æдасдзинад фæтыхджындæр кæныны нысанæн. Ацы фадыджы фæндагон инвентарь æвæрдта генподрядон организаци «Дорэкспострой»-ы организаци», - загъта Гаглойы фырт.
Уый куыд банысан кодта, афтæмæй информацион фæндагон нысæнттæн Арæзтады министрадæн рахицæн æрцыд æхсæз милуан сомы.
Министры хæдивæг фидарæй загъта, зæгъгæ, Арæзтады министрад этапгай хæрзарæзт кæны республикæйы æппæт сосæ фæндаг, афтæ ма цæрæн пункты уынгтæ, фыццаг рады горæт Цхинвалы уынгты.
Горæты уынгты фæндагон нысæнттæ æвæрд кæй æрцыдысты, уый ахсджиаг хъуыддаг у. Кæй зæгъын æй хъæуы, уый фæахъаз уыдзæн фæндагыл цæуыны фæткхалынады цауты, авариты нымæц фæкъаддæр кæнынæн.
Уыимæ ма фæндагон нысæнттæ цы уынгтыл æвæрд æрцыдысты, уыцы уынгтæ рафидыдтой, «фæцæрдгъуыздæр» сты. Фæлæ, хъыгагæн, уыцы хъуыддаг фистæгæй цæуджыты проблемæйыл уадиссаг нæ бандæвта. Цæвиттонæн æрхæсдзынæн Хъайтарты уынджы.

Хъайтарты æмæ Тæболты Сергейы уынгтæ кæм иу кæнынц, уым фистæгæй цæуджытæн иу тротуарæй иннæмæ ахизыны нысан бæргæ конд æрцыд, фæлæ ... Цæмæй иу тротуарæй иннæмæ ахизай, уый тыххæй ацæуын хъæуы, машинæтæ кæм скъæрынц, уыцы фæндагыл, кæнæ та ахизын хъæуы, фæндаджы астæу цы газонтæ арæзт æрцыд, уыдоныл.
Науæд та ацæуын хъæуы Исахъы уынджы онг кæнæ та ссæуын хъæуы «Мегофоны» бæстыхайы цурмæ. Уый та у иу хъусы сæрты иннæмæ æвналыны хуызæн.
Кæй зæгъын æй хъæуы, уыцы хъуыддаг проблемон у, куыд фистæгæй цæуджытæн, афтæ шофыртæн дæр, уымæн æмæ фистæгæй цæуджыты бар-æнæбары бахъæуы фæндагыл ахизыны фæтк фехалыны сæр - «æнæран» бынæтты ахизынц фæндагыл æмæ уымæй æвзæрын кæнынц аварион уавæр.
Хъыгагæн, нæ аразджытæ исты куы саразынц, уый фæстæ та хъуыды фæкæнынц. Уый та æвзæрæрдæм æндавы нæ горæты хæрзарæзтадыл. Афтæ куынæ уаид, уæд нæ горæт абон кæронмæ арæзт фæуыдаид.
Цæмæй уавæр рараст уа, уый тыххæй раздæр ахъуыды хъæуы æмæ саразын хъæуы лæмбынæг план, уый фæстæ та уыцы планмæ гæсгæ æрæвналын хъæуы хъуыддагмæ.
Фæндæгты цур газонтæ дæр арæзт æрцыдысты талф-тулфтæй æмæ уый фæстиуæгæн хынцыдгонд не 'рцыдысты куыд машинæскъæрджыты, афтæ фистæгæй цæуджыты домæнтæ.
ОСИАТЫ Индирæ