Nog adres

Районты/ БÆРÆГБОН ХЪÆЛДЗÆГ РАВГИМÆ

Кæй зæгъын æй хъæуы, Ног азы æрцыдмæ æнæрхъæцæй фенхъæлмæ кæсынц стырæй, чысылæй. Фæкувынц æм, цæмæй сын æрхæсса ногдзинæдтæ, æнæниз, æнæмаст цард æмæ бирæ æндæр зæрдæйæн хорз фæндиæгтæ. Æрвылаз дæр куыд нæ горæты, афтæ районты дæр Ног азы бонты сæйрагæдæр хиирхæфсæн мадзæлттæй сæ иу свæййы иумиаг, ома, районон назбæласы фарсмæ хъæлдзæг рæстæг арвитын. Æмæ та ныр дæр рауадис афтæ. Ног азыл хорз зæрдæйы равгимæ сæмбæлдысты Дзауы районы дæр. Æрæджы та Зæронд Ног азы цытæн районы администрацийы культурæйы хайады бацæттæгонд программæмæ гæсгæ Хуыцъейы скъолайы агъуысты уагъд æрцыдис бæрæгбонон мадзал. Культурæйы хайадæн ацы мадзал ауадзынæн баххуыс кодта Дзауы районы администрацийы разамынад Чилæхсаты Владимиры къухдариуæгадæй.

Банысан кæнын хъæуы уый, æмæ Дзауы районы фæсивæд рагæй фæстæмæ дæр бæрæгбонтæ нысан кæнынмæ рæвдз уыдысты, фæлæ ивгъуыд æнусы кæронмæ æввахс стыр зæххæнкъуысты рæстæджы районы хæдзæрттæ бынтон кæй ныппырх сты, уыдон æмрæнхъ, Культурæйы хæдзар дæр, æмæ сæ бынæтты та арæзт бирæ кæй ницы ма æрцыдис, уый бирæбæрцæй къуылымпы кæны сæ бæрæгбонты парахат бынаты нывыл ауадзыны хъуыддагæн. Ацы бæрæгбонон мадзал парахат уавæры ауадзынæн æмбæлон бынат кæй нæ разынд, уый аххосæй районы фæсивæд хуынд æрцыдысты Хуыцъейы скъолайы агъуыстмæ. Ногазон изæр уагъд кæм хъуамæ æрцыдаид, уыцы зал иттæг аив сфæлыстой скъоладзаутæ æмæ районы Культурæйы хæдзары кусджытæ. Бæрæгбонмæ, сæйраджыдæр, æрбахуыдтой районы алкæцы уагдонæй дæр цалдæр кусæджы, фæсивæды минæвæртты. Мадзалмæ фæуазæг сты Дзауы районы администрацийы сæрдар Чилæхсаты Владимир æмæ йæ хæдивджытæ.
Районы Культурæйы хæдзары кусæг Санахъоты Анжелæ залмæ æрæмбырдуæвджытæн арфæ ракодта Ног азы цытæн, хатыр ракуырдта, ахæм цытджын бæрæгбонтæ къуындæг уавæрты насан кæй цæуынц æмæ фылдæр адæм æрбахонын сæ бон кæй нæу. Уымæн йæ цæст бауарзта фæсивæдæн, æмткæй адæмæн, хорз фæндиæгтæ. Уый фæстæ музыкалон номыртæй адарддæр кодтой бæрæгбонон мадзал. Зарджытæ фæсивæдæн сæ зæрдæты бауагътой бæрæгбонон уæлтæмæн æнкъарæнтæ, бирæ фæхъæлдзæгдæр сты æмæ сын уæд мадзаламонæг загъта, зæгъгæ, рæстæг кæй у дзырдарæхст æмæ хъуыдыифтонгдзинадæй конкурс ауадзын. Конкурсы ерыс цыдис фынгæй фынджы æхсæн. Алы фынджы фарсмæ бадджытæ дæр архайдтой хуыздæр, аивдæр исты æрæмысыныл. Мадзал сæ æхцондзинадхæссæг зарджытæй барæсугъд кодтой районы сфæлдыстадон къорд «Амонд» Къæбысты Маир æмæ Санахъоты Аланы хайадистæй.
Ерыстæ дзы цыдис фæсивæдæн сæ интеллектуалон цæттæдзинад рафæлгъауыны фæдыл. Уагъд ма дзы æрцыдис лотерея, цыран æрæмбырдуæвджытæн сæ фылдæр рамбылдтой алыгъуызон призтæ. Ног азы цытæн æппæт æрцæугæ адæмæн Чилæхсаты Владимир йæ рады зæрдæбын арфæ ракодта. Йæ цæст сын бауарзта æнæниздзинад, амонд, æнтыстытæ царды, ахуыры, хъæлдзæг бонтæ æмæ мидбылхудт. «Уадз, ацы аз уын суæд хорзæрдæм ивындзинæдты æмæ æнтысгæ хъуыддæгты аз», - загъта Чилæхсаты Владимир.
Бæрæгбонмæ æрцæуджытæ стыр æхцондзинад банкъардтой бæрæгбонон изæрæй æмæ уыдон дæр стыр бузныджы ныхæстæ дзырдтой, йæ цæттæ кæныныл зæрдиагæй чи бакуыста, уыдонæн.
ЦХУЫРБАТЫ Ларисæ