Nog adres

ФÆБÆРÆГ СТЫ КОНКУРСЫ УÆЛАХИЗДЗАУТÆ

Кæронмæ бахæццæ уырыссаг æвзаджы æвзонг ахуыргæнджыты ‘хсæн конкурс. Сорганизаци йæ кодта РХИ-йы Уырыссаг æвзаг æмæ литературæйы ахуыргæнджыты ассоциаци. Конкурсæн хатдзæгтæ скодтой Республикон библиотекæйы цы мадзал «Учитель и книга» ауагъдæуыд, уым.
Конкурсы фæуæлахизуæвджытæн æмæ призертæн арфæ кæнынмæ æрбацыдысты Хуссар Ирыстоны Уæрæсейы минæварады кусджытæ, Ахуыргæнджыты ассоциацийы, æхсæнадон организациты минæвæрттæ, горæты скъолаты ахуыргæнджытæ, библиотекæйы кусджытæ.
Конкурс «Я учитель – 2012» цыд æртæ мæйы дæргъы. «Конкурс æрбаиу кодта нæ республикæйы горæтты æмæ хъæуты курдиатджын ахуыргæнджыты.

Йæ нысан уыд сбæрæг кодтаид æмæ сæ фарс рахæцыдаид æвзонг педагогтæн, банысан сын кодтаид сæ профессиналон æнтыстдзинæдтæ æмæ аздаха æхсæнады хъусдард ныры дуджы РХИ-йы ахуырады цы бынат æмæ цы роль æххæст кæны ахуыргæнæг, уымæ», - загъта Уырыссаг æвзаг æмæ литературæйы ахуыргæнджыты ассоциацийы президент Тедеты Залинæ.
Тедион ма бузныджы ныхæстæ загъта Хуссар Ирыстоны Уæрæсейы минæварадæн, ахæм конкурс ауадзыны тыххæй.
Йæ рады РХИ-йы Уæрæсейы æххæстбарджын минæвар Къарджиаты Эльбрус загъта, зæгъгæ, конкурс дарддæр фидар кæндзæн ахуыргæнджыты фæлтæрты бастдзинад.
Уый ма банысан кодта, зæгъгæ, минæварад архайдзæн, цæмæй æххуыс кæна Хуссар Ирыстоны ахуыргæнджытæн. «Ацы аз нæхи æмæ фонд «Русский мир»-ы тыхтæй кæронмæ бакодтам проект, кæцыйы руаджы 160 ахуыргæнæджы, практиконæй, сæ квалификаци фæбæрзонддæр кодтой Мæскуыйы», - загъта дипломат.
Конкурсы организатортæн ма бузныджы ныхæстæ загътой мадзалы æндæр хайадисджытæ, уый фæстæ фехъусын кодтой конкурсы фæуæлахизуæвæг æмæ призерты нæмттæ. Конкурсы фæуæлахиз Цхинвалы 5-æм скъолайы уырыссаг æвзаг æмæ литературæйы ахуыргæнæг Туаты Тамарæ. Конкурсы фæуæлахизуæвæг æмæ призертæн радтой грамотæтæ, æхцайы призтæ æмæ зæрдылдарæн лæвæрттæ.