Nog adres

ЦÆРДЖЫТÆ ДОМЫНЦ…

DSC00372.JPG
Ацы аз июны мæйы нæ газеты редакцимæ æрбацыдысты, Шанхайы районмæ хæстæг цы 2 муниципалон, дыууæуæладзыгон цæрæн хæдзæрттæ ис, уыдоны цæрджытæ. Бахатыдысты, цæмæй редакцийы кусджытæй исчи рацæуа æмæ бынаты фена, 20 азы бæрц ацы хæдзæртты цæрджытæ доны аххосæй цы тухитæ æвзарынц, уый. Цæрджыты ныхæстæм гæсгæ, уыдон республикæйы иу инстанци дæр нал ныууагътой сæ хъаст кæмæ нæ бахастой. Уыдысты сæм уыцы хъæстыты халдих гæххæттытæ. Уæд мах тынг бацымыдис кодтам, уагæр цавæр зын аскъуыддзаггæнæн у ацы фарст. Ацыдыстæм бынатмæ æмæ федтам нæхи цæстæй, æцæгæйдæр ам цы 19 бинонтæ цæрынц, уыдон доны аххосæй цы тухитæ æвзарынц. Ацы хæдзæрттæ арæзт æрцыдысты 1971 азы. Куы æрбынат кодтой ам, уæд алы фатеры дæр дон уыд, уый фæстæ цадæггай сæфын байдыдта. Цæрджытæн-иу бæрнон адæймæгты ныхас уыд: «Уæ хæдзæрттæ уæлвонг бынаты арæзт сты, Хъуылайы фырты уынгмæ цы доны хæ-тæл иугонд ис, уымæн та йæ æлхъывдад фадат нæ дæтты, цæмæй сымахы онг хæццæ кæна». Æмæ цæрджытæ дæр уал азы дæргъы хæсгæ дон æмæ цыхцырæджы донæй пайда кодтой.
Уæлдæр куыд загътон, афтæмæй ацы цæрджыты тыххæй уацтæ мыхуыргонд æрцыд канд нæ газеты нæ, фæлæ «Южная Осетия»-йы дæр. Кæй зæгъын æй хъæуы, Президент Тыбылты Леонид йæ хъус дары прессæйы мыхуыр æрмæджытæм æмæ цалдæр боны фæстæ ацы районы цæрджытæм Хицауады Сæрдар Хуыгаты Ростик йæ хæдивæг Джиоты Аллæимæ фæбалц.

Бынаты сахуыр кодта проблемæ, æмæ æмбæлон органтæн хæс æрцыд, цæмæй ацы адæмы фарст аскъуыддзаг кæной. Дыууæ бонмæ дон арæзт æрцыд. Æрмæст уал дон цæуын райдыдта уынджы. Уæд сын Президент æмæ иннæ бæрнон кусджытæ дæр ныфс бавæрдтой, тагъд дон алы фатеры дæр кæй æрцæудзæнис арæзт. Цæрджыты цинæн кæрон нал уыд, суанг ма куывд дæр скодтой. Доны аххосæй ардыгæй цы æвзонг бинонтæ алыгъдысты, уыдон дæр фæстæмæ бафæндыд æрбаздæхын. Ахæм ныфсытæ цæрджытæн кæд сæрды мæйты бавæрдтой, уæддæр сæ ныфс уыд азы кæронмæ сын æй уæддæр кæй сараздзысты. Фæлæ…
Ацы хæдзары цæрджытæй сæ иу Дудайты Гиви куыд зæгъы, афтæмæй «фатертæм дон кæй нæ цæуы, уымæн йæ аххосаг у, иу хæдзары канализа-цион хæтæлтæ бынтондæр кæй нæй, иннæ хæдзары та 20 азы бæрц дон кæй нæ цыд, уый аххосæй згæхæрд кæй сты. Ацы фарст зын скъуыддзаг-гæнæн кæй нæу, уымæ гæсгæ нын Президент йæхæдæг ныфс бавæрдта, æнæмæнг ацы фарст скъуыддзаг кæй æрцæудзæнис».
Цæрджытæ канд æнæ донæй нæ тыхстысты, фæлæ ма уæлвонг кæй цæрынц, уымæ гæсгæ зымæджы бонты уыдонмæ машинæ нæ фæцæуы, стæй сæ брон кæм калой, уыцы бынат сын кæй нæй, уымæй дæр тынг тыхстысты. Æппæт ацы фарстатæ аскъуыддзаг кæныны ныфс бæргæ бавæрдтой, фарст кæмæ хауд, уыдон Президенты раз, фæлæ куыд федтам, афтæмæй абон дæр проблемæ иуварс не 'рцыд.
Цæрджыты иу хай куыд зæгъы, афтæмæй сæ цæсгом нæ хъæцы Президентмæ алы ахæм лыстæг фарстаты фæдыл хатын, фæлæ та йæм æнæбахатгæ нæй. «Уадз, худинаг уæд, уыцы бæрнон кусджытæн, кæцытæ не 'ххæст кнынц республикæйы Президенты хæстæ…», - зæгъынц цæрджытæ.
Уазæгты М.