Nog adres

Конкурс / «СТЪАЛЫТЫ ФЕРТТЫВД» АГУРЫ КУРДИÆТТÆ

Æвзонг адæймагæн йæ курдиат райхæлын кæнынæн хатт бирæ ницы фæхъæуы. Хъæуы æрмæстдæр æмбæлон рæстæджы æмбæлон фадæттæ саразын. Уымæ гæсгæ раст бакодта радиостанц «Ир» республикæйы культурæйы министрад æмæ фæсивæдон политикæйы фæдыл управлениимæ иумæ кæй бацæттæ кодтой егъау проект «Стъалыты ферттывд», зæгъгæ.
Уый æрмæст хиирхæфсæн мадзал нæу, фæлæ, сæйраджыдæр у нæ республикæйы курдиатджын фæсивæды ‘хсæн егъау конкурс. Æрвылизæр дæр къуырисæрæй майрæмбонмæ йæ хайадисджытæ кæрæдзиимæ ерыс кæнынц æмæ дарддæр дæр кæндзысты цыппар номинацийы: вокалон æххæсткæнынад, аив кæсын, музыкалон инструменттыл цæгъдын æмæ юмористон инсценировкæ. Йæ хайадисджытæ æдæппæт сты 125 æрыгон адæймаджы. Сæ ралæудтытæн сын аргъ кæнынц компетентон тæрхонгæнджытæ, сæ сæргъ Хетæгкаты Къостайы номыл паддзахадон дррамон театры аивадон разамонæг, РХИ-йы сгуыхт артист Бибылты Сослан, афтæмæй. Жюрийы иннæ дыууæ уæнджы ивд цæуынц æмæ вæййынц не сфæлдыстон интеллигенцийы минæвæрттæ-музыканттæ, фысджытæ, культурæйы министрады æмæ фæсивæдон политикæйы фæдыл управленийы минæвæрттæ. Конкурс амонынц нæ республикæйы сгуыхт ахуыргæнæг, Сывæллæтты сфæлдыстадон галуаны методисткæ, сабиты музыкæйы композитор Дзигойты Маринæ æмæ Хуссар Ирыстоны паддзахадон драмтеатры артисткæ Сагирова Миленæ.kabulova.jpg
Проект æххæст цæуы республикæйы ахуырады, зонады æмæ фæсивæдон политикæйы министрады æмæ культурæйы министрады æххуысæй æмæ конд у æртæ турæй: æвзарæн, æрдæгфиналон æмæ финалон. Финалон турмæ ахиздзысты цыппар претенденты, алы номинацийæ дæр – иу æмæ сæ алкæмæ дæр æнхъæлмæ кæсынц зынаргъ призтæ æмæ лæвæрттæ радиостанц «Ир»-æй.

Конкурс организацигæнджытæ куыд зæгъынц, афтæмæй йæ нысан æрмæст æрыгон курдиæттæ æргом кæнын нæу, фæлæ ма у, цæмæй æхсæнады хъусдард здæхт æрцæуа ирон æвзаджы проблемæмæ. Æппæт йæ хайадисджытæ, амонджытæ æмæ хуынд уазджытæ дæр дзурынц сæ мадæлон ирон æвзагыл.
Конкурсы фæуæлахизуæвджытæ æмæ финалисттæ хайад райсдзысты ахуыры азы фæуды республикæйы скъолаты рауагъдонты номыл цы гала-концерт уыдзæнис, уый.
Кæй зæгъын æй хъæуы, конкурсы алцы бæрзонд æмвæзадыл, æнæаипп нæу, фæлæ дызæрдыггаг нæу уый æмæ нæ æрыгон фæсивæдæн фадат кæй фæцис се ‘взыгъддзинæдтæ, сæ курдиат раргом кæнынæн. Æмæ дзы кæд алкæмæн нæ, уæддæр дзы бирæтæн сæ курдиаты ферттывд цыбыррæстæгон ма уæт, фæлæ сын тынгæй-тынгдæр æрттивæд æмæ цæхæртæ калæт.