Nog adres

Не 'взаг нæ хæзна/ Ныхасæй рахизын хъæуы хъуыддагмæ

10-æм декабры ирон æвзаг бахъахъхъæнын æмæ рæзты хъуыддаджы тыххæй Хицауады уыдис къамисы фыццаг рабадт. Уый фæдыл æрæджы арæзт æрцыдис сæрмагонд къамис æмæ йын сæрдариуæг кодта РХИ-йы Хицауады Сæрдар Хуыгаты Ростик. Министрты кабинеты уæнгтæй дарддæр ма къамисы скондмæ бацыдысты нæ республикæйы зонадон æмæ сфæлдыстадон интеллигенцийы минæвæрттæ, ахуыргæндтæлингвисттæ, РХИ-йы Парламенты депутаттæ.
Æрæмбырдуæвджытæ æруынаффæ кодтой мадæлон æвзаг сфидар æмæ йæ райтынг кæныны иууыл эффективондæр хъуыддæгтыл. Джусойты Нафийы хъуыдымæ гæсгæ иууыл хуыздæр уаид, цæмæй арæзт æрцæуа æмæ сног кæнæм ирон скъола. «Мах астæуккаг ахуыргæнæндæтты 7-8 къласты онг куы ахуыр кæнæм нæ мадæлон æвзагыл, уæд уымæн уыдзæнис хуыздæр фæстиуджытæ æмæ æвзагыл бандавдзæнис хорзæрдæм», - загъта Джусойты Нафи.

Профессор Гæбæраты Никъала дæр хорзыл банымадта ирон скъола бакæныны идейæ æмæ ма йæ ныхасы банысан кодта ирон æвзаджы ахуыргæнæн чингуыты проблемæйы хъуыддаг дæр. «Фыццаг рады ахуыргæнæн чингуыты фарст æнæмæнгæй хъæуы æвæстиатæй аскъуыддзаг кæнын. Мах хъуа-мæ саразæм æппæт дæр, цæмæй ирон дзырд, куыд дзæнгæрæг, афтæ фидарæй хъуамæ зæлланг кæна æхсæнады, - банысан кодта Гæбæраты Никъала. - Стыр практикон æххуыс та уыцы хъуыддаджы бакæндзысты телеуынынад, радио, сфæлдыстадон уагдæттæ. Æнæмæнг хъуыддаг у, цæмæй алы бон дæр бынæттон телеуынынады æмæ радио уагъд цæуой, ирон æвзаг чи пропагандæ кæна, ахæм алæвæрдтæ. Хорз уаид, æмæ дзы арæхдæр уагъд куы цæуиккой беседæтæ филологтимæ, литератортимæ æмæ æндæр ирон æвзаджы актуалон фарстаты фæдыл. Телеуынынад адæмы æрбангомдæр кæндзæнис ирон адæмы сæ мадæлон æвзаг æмæ литературæмæ. Хъæуы кусын ацы фарстыл серьезонæй, уымæн æмæ у нæ риссаг фарст», - бафтыдта йæ ныхасмæ Гæбæраты Никъала.
Æмбырды ныхасы рацыд ХИПУ-йы ирон æвзаджы ахуыргæнæг, доцент Битарты Зоя. Уый, сæйраджыдæр, банысан кодта æвзагзонынады кæй нæй æрыгон кадртæ. «Цалдæр дæс азы мидæг мах æрмæстдæр бацæттæ кодтам 3 æрыгон специалисты. Абон æвзагзонынады професси не 'хсæнады престижоныл нымад нæ цæуы, нæ факультетмæ цæуынц иууыл къаддæр абитуриенттæ», - катайгæнгæ дзырдта Битарты Зоя. Уый ма йæ раныхасы банысан кодта, зæгъгæ, ирон æвзг пропагандæ кæныны хъуыддаджы стыр нысаниуæг ис театрæн. «Театр у ирон культурæйы артдзæст, æмæ куырдадз. Фæлæ абон махæн нæ театр дæр ис тынг æвзæр уавæры. Ног театры сценæйыл дæсгай азты дæргъы æвæрд нал цæуынц ирон спектаклтæ, кæцытæ æвдисæн уаиккой националон спецификæйæн æмæ сценæмæкæсæджы ахуыр кæниккой ирон культурæ, ирондзинадыл. Хуыздæр зонгæ кæниккой фæсивæды нæ фыдæлты æгъдæуттæ æмæ традицитимæ, историимæ æмæ афтæ дарддæр», - банысан кодта Битарты Зоя. Йæ хъуыдымæ гæсгæ, хуыздæр уаид ирон æвзаг æмæ литературæйы уроктæ куы фæфылдæр кæниккам, уый.
Тыбылты Александры номыл Хуссар Ирыстоны паддзахадон университеты зонадон куысты фæдыл проректор Остъаты Джульеттæ та къамисы уæнгты базонгæ кодта ирон æвзаг райтынг кæнын æмæ йæ бахъахъхъæныны фæдыл цы программæ бацæттæ кодта, уыимæ.
Æмбырды ма æвзаджы уавæры тыххæй сæ хъуыдытæ дзырдтой къамисы æндæр уæнгтæ дæр.
Кæронбæттæны къамисы сæрдар, РХИ-йы Хицауады Сæрдар Хуыгаты Ростик ныфс бавæрдта, специалисттæ цы фипаинæгтæ æмæ домæнтыл дзырд-той, уыдон хаст кæй æрцæудзысты ирон æвзаг райтынг кæныны иумиаг программæмæ, кæцы æввахс рæстæджы бацæттæгонд æмæ сфидаргонд æрцæудзæнис РХИ-йы Парламенты.