Nog adres

Спорт

МИНИ-ФУТБОЛ
Цхинвалы фæцис Хуссар Ирыстоны хъайтар Козаты Левы номарæн турнир мини-футболæй. Левик, афтæ йæ хуыдтой йе 'мгæрттæ æмæ хиуæттæ, фæмард 2008 азы гуырдзиаг тыхгæнджытæн аккаг ныхкъуырд радтыны рæстæджы. Ерысты хайад райстой Цхинвалы скъолаты ахуырдзаутæ, æдæппæт 10 командæйы. Хъæзтытæ цыдысты къуырийы дæргъы Республикон комплексон спортивон скъолайы залы. Фембæлдтытæ иууылдæр акæнгæйæ финалмæ рахызтысты 3-æм æмæ 9-æм скъолаты командæтæ. Ацы дыууæ командæ фембæлдысты сæ дæлкъорды хъæзтыты æмæ тыхджындæр уыд 3-æм скъола - 4:1. Фæлæ уый фæстæ финалон хъазтмæ хуыздæр цæттæйæ бацыдысты 9-æм скъолайы ахуырдзаутæ æмæ рамбылдтой 3:1 хыгъдæй æмæ афтæмæй систы ерысты уæлахиздзаутæ.

Турниры 3-аг бынат бацахсыны хъазты спортивон амонд бахудт гимназ «Рухс»-ы хъазджытæм, кæцытæ 4:3 хыгъдæй рамбылдтой кадетон скъолайы.
«Турнир уагъд цæуы ныр 2-аг хатт», - зæгъы Левы фыдыфсымæр Козаты Вячеслав. - «Ацы скъоладзаутæ ноджы хуыздæр цæттæ сты. Алы фембæлды дæр цыд стыр спортивон тохтæ. Бузныг мæ фæнды зæгъын турниры организатортæ, æхсæнадон организаци «Зиу» æмæ Фæсивæдон политикæ, спорт æмæ туризмы хъуыддæгты фæдыл комитетæн. Ахæм номарæн турниртæ бирæ хъæуы уадзын, цæмæй фæсивæд хъуыды кæной сæ хъайтарты».
Ерысты хайадисджытæн раарфæ кодтой ерысты сæйраг тæрхонгæнæг Джиджджойты Алан, æхсæнадон организаци «Зиу»-ы минæвар Гæбæраты Эдуард æмæ футболон скъолайы директор Битеты Зауыр. Турниры уæлахиздзаутæ æмæ призертæ хорзæхджын æрцы-дысты кубоктæй æмæ кады грамотæтæй. Фæуæлахизуæвæг коман-дæйы кубокæй схорзæхджын кодта Козаты Левы фыд Алыксандр.
«Турнир уыдзæн æрвылазон. Ныр дзы хайад райстой хистæр-къласонтæ. Фæлæ иннæ хатт хицæнæй ерыстæ уагъд цæудзысты астæуккаг кълæсты ахуырдзауты 'хсæн дæр», - банысан кодта республикон футболон скъолайы директор Битеты Зауыр.
Хорзæхджын ма æрцыдысты турниры хуыздæр хъазджытæ Уазæгты Родион, Цхуырбаты Алан æмæ Тедеты Станислав. «Уæлахизмæ тырнындзинады» приз лæвæрд æрцыд Бестауты Давидæн. Символикон уый у, æмæ «Хуыздæр техникæ»-йы приз кæй райста Хуссар Ирыстоны хъайтар Джиджджойты Джетæйы фырт Сослан.

ДЗЮДО
Дзæуджыхъæуы уагъд цыд РЦИ-Аланийы чемпионат дзюдойæ фæсивæды 'хсæн. Уым хайад райстой хуссаирыстойнаг спортсментæ дæр. 60 кг уæзы категорийы бронзæ майдан рамбылдта Бекъойты Георги. Уый йæ ныхмæлæуджытимæ фембæлд 6 хатты æмæ дзы 5 фæуæлахиз. 3-аг бынат бацахсыны тохы Георги рамбылдта дзæуджыхъæуккаг богалы. Цхинвайлаг дзюдоистты тренертæ сты Касаты Ацæмæз æмæ Советон Цæдисы спорты дæсны Тъуриты Тенгиз.
«Георги йæхи хорз равдыста. Уый размæ ма Цæгат Ирыстоны уагъд цыд ахуырады министрады чемпионат. Уæд мæ хъомылгæнинаг фæуæлахиз. Георги ацы æнтысты фæрцы баууæндыд йæ тыхтыл, райдыдта хуыздæр тренировкæ кæнын æмæ мæнмæ гæсгæ, дарддæр дæр æвдисдзæн хорз бæрæггæнæнтæ», - загъта Касаты Ацæмæз.
Ныр Георги йæхи цæттæ кæндзæн Цæгат Кавказы Федералон зылды чемпионатмæ.
ФУТБОЛ
Уыдысты футболæй Уæрæсейы премьер-къорды радон, 19 туры хъæзтытæ. Дзæуджыхъæуы «Алани» уазæгуаты æмдыхæй 1:1 хыгъдæй ахъазыд Краснодары «Кубань»-имæ. Ацы хъазты размæ алайнæгтæ фæхæрд сты 7 хатты фæд-фæдыл æмæ ныр иу очко кæй бакуыстой, уый «Алани»-йæн у æнтыст. Специалистты хъуыдымæ гæсгæ премьер-къорды баззайыны тыххæй алайнæгтæ сæйраджыдæр тох кæндзысты Самарæйы «Крылья Советов» æмæ Нижний Новгороды «Волга»-имæ. Ацы дыууæ командæйы сæ фæстаг хъæзтыты фæуæлахиз сты. «Алани» турнирон таблицæйы 11 очкоимæ дарддæр цæуы 15-æм бынатыл. 14-æм бынатыл цæуæг «Крылья Советов»-æн ис 16 очкойы.
19-æм туры фæстæ чемпионаты уыдзæн паузæ 10-æм марты онг. Уыцы бон «Алани» фысымиуæг кæндзæн «Ростов»-æн. Уæдмæ та хъазджытæн уагъд цæудзысты цæттæгæнæн сбортæ. Командæмæ хуынд æрцæудзысты ног хъазджытæ. Ныридæгæн командæ контракт бафыста бразилиаг футболист Рене Брессанимæ, кæцы хъазыд белорусаг БАТЭ-йы. Уыцы рæстæджы ма командæйы къухдариуæгад ауæй кæнынмæ хъавы иу къорд футболисты, кæцыты хъазт нæ фæцыд клубы тренерон штабы зæрдæмæ.
ХУРИТЫ Б.