Nog adres

ХЪÆУЫ ПАТРИОТИКОН ХЪОМЫЛАД

DSCN7369_0.jpg
Ирон адæм сæ царды бирæ зын фæндæгтыл рацыдысты, Ирыстоны фыртты бирæ алыхуызон хæстыты бахъуыдис тох кæнын дæр æмæ ирон лæджы ном дæлæмæ никуы æруагътой. Ирон хæстон хъайтарты нæмттæ дардыл айхъуыстысты Стыр Фыдыбæстæйон хæсты рæстæджы дæр. Уымæ гæсгæ уыцы уæззау тугкалæн хæсты рæстæджы куыд тох кодтой знаджы ныхмæ, куыд æй фæтардтой нæ бæстæйæ, æппæт ацы хабæрттæ цæмæй нæ кæстæртæй ма рох кæной, уый тыххæй скъолаты ахуыргæнинæгтимæ фæхъæуы уæлæмхас куыст кæнын. Уый та ахъаз кæны сывæллæтты патриотон удыхъæддзинадыл ахуыр кæнын æмæ сæ фыдæлты фарнæн дæр аргъ кæнынæн дæр.
Ахæм хъуыдыйыл лæуд у нæ горæты 6-æм астæуккаг скъолайы æдасдзинад æмæ цардуагон архайды ахуыргæнæг Тедеты Алик. Уый 27-æм ноябры ацы скъолайы 10-æм æмæ 11-æм кълæсты ахуыргæнинæгты фембæлын кодта Стыр Фыдыбæстæйон хæсты хайадисджытимæ, æфсады æмæ куысты ветерантæ: профессор Гæбæраты Никъала, фыссæг Харебаты Леонид, нæ горæты Ветеранты советы сæрдар Гобозты Æхсар æмæ йæ хæдивæг Уалыты Гайозимæ.
Нæ буц ветерантæ ахуыргæнинæгты базонгæ кодтой сæ царды рацæугæ фæндæгтимæ, сæ хæстон æмæ æфсæддон архайджытимæ. Зæгъæм, Гæбæ-раты Никъала, Стыр Фыдыбæстæйон хæсты ветеран сын лæмбынæг радзырдта, цыдæриддæр йæхи цæстæй федта æмæ бавзæрста уыцы уæззау тугкалæн хæсты, уыдæттæ. Уый куыд загъта, уымæ гæсгæ иу адæймаджы цард дæр æнæхъæн истори у, Стыр Фыдыбæстæйон хæст та цыппар азы цыдис, фæмард дзы ис бирæ адæм, фæлæ уæддæр адæмæн сæ иумиаг бæллиц уыдис фæуæлахиз уæвын. Æгæрыстæмæй, сылгоймæгтæ дæр хæсты быдыры уыдысты тынг активон, чи кæм куыд арæхстис, уымæ гæсгæ.

Йæ хъуыдытæ ма загъта, фыссæг Харебаты Леонид:
- Æз стыр Фыдыбæстæйон хæсты хайад нæ истон, къаннæг лæппуйæ мæ æрæййæфта, фæлæ-иу мах та колхозы куыстам, уымæй æххуыс кодтам Райгуырæн бæстæйæн. Фæлæ йæ куыд фехъуыстат уымæ гæсгæ не 'мзæххонты хъæбатырдзинад айхъуыстис дардыл, инæлартæ дæр махæй фылдæр никæмæ уыдис. Уыцы хæсты кæд уæлахиз сæ къухы бафтыдис, уæддæр та нæ адæмы ссæдз азы дæргъы бахъуыдис тох кæныны сæр. Хуссар Ирыстоны æвзонг лæппутæ сæ риутæй бахъахъхъæдтой сæ райгуырæн зæхх. Уый тыххæй сæ уд нывондæн чи æрхаста, уыдоны рухс нæмттæ бахъахъхъæнæм. Мах стæм скифты, сæрмæтты, нарты байзæттаг æмæ сын ма ферох кæнæм сæ фарн.
Уалыты Гайоз:
- Нæ зынаргъ кæстæртæ, сымах афтæ чысылтæ нал стут, уымæ гæсгæ хъуамæ уæ митæн дзуапп дæттат. Нæ сомбон сымахæй кæнгæ у, уый тыххæй уæ абон сымах хъæуы бирæ кусын æмæ архайын. Уæ фыццаградон хæстæ сты цæмæй хорз ахуыр кæнат, хистæртæн кад кæнат, æмæ уæ кæрæдзи уарзат. Тагъд сымах æфсæддон службæ кæныны сæр дæр бахъæудзæнис, уымæй дæр тæрсын нæ хъæуы. Хъуамæ нæ исчи хъа-хъхъæна. Æвзæр хъуыддæгтæй нæхи бахизæм, афтæ хъуамæ уарзæм нæ культурæ æмæ традицитæ дæр. Уæд уыдзыстæм Райгуырæн бæстæйы æцæг патриоттæ.
Гобозты Æхсар:
- Мæн дæр бафæнддзæнис ацы ахуыргæнинæгтæн, цæмæй нæ куырыхон хистæрты кæддæриддæр фæзмой, уымæн æмæ уыдонмæ ис царды стыр фæл-тæрддзинад.
Кæронбæттæны ахуыргæнинæгтæ уазджытæм лæвæрдтой фарстатæ æмæ-иу райстой æмбæлон дзуаппытæ. Ацы скъолайы ирон æвзаг æмæ литературæйы ахуыргæнæг Дыгъуызты Лианæ уазджытæн загъта бузныджы ныхæстæ.
ТУАТЫ Ларисæ