Nog adres

Сæрды тæвд бонтæ æмæ адæймаджы æнæниздзинад

Сæрд йæ тæккæ тæмæны ис, тæвд бонтæ кæны. Ахæм рæстæджы та иуæй-иу низтæ кæнынц карздæр, адæймаджы æнæниздзинадыл æндавынц æвзæрæрдæм. Цы хъæуы аразын, цахæм хæринæгтæй хъæуы пайда кæнын кæнæ хи хизын, стæй куыд хъæуы æнæниздзинад фидар кæнын, уыдон тыххæй у йæ ныхас Цхинвалы горæтон поликлиникæйы фадыгон терапевт Хетæгкаты Нинæйæн.

- Тæвд боны æмбæстæгтæ, уæлдайдæр рынчынтæ æмæ сывæллæттæ сæ рæстæг хъуамæ æрвитой аууоны, пайда кæной худ кæнæ кæлмæрзæнæй. Уыцы рæстæг хъуамæ аххæсса 12 сахатæй боны 16 сахатмæ. Фæлæ вæййы афтæ, æмæ хуры тæвдмæ адæймаг бирæ рæстæджы фæлæууыд, бахъыгдард вæййы хуры тынтæй. Ахæм рæстæджы йын бынаты æвæстиатæй бакæнын хъæуы медицинон фыццаг æххуыс. Æрхуыссын кæнæн æй хъæуы зæххыл. Цæмæй туг сæрмæ тынг ма цæуа, уый тыххæй къæхтæ хъуамæ бæрзонддæр уой сæрæй. Радтын ын хъæуы сабыргæнæн хос, иууыл хуыздæр та у «Тагъд æххуыс»-мæ фæдзурын.

Къаддæр æмæ стæмдæр хатт хъæуы уазал нуазинæгтæ нуазын, уымæн æмæ уыдон аххосæй хъуыр сриссы, тæвд схизы, адæймаг райдайы хуыфын.

Хæрын хъæуы халсæрттæ, дыргътæ, уыцы нымæцы мæнæргъы, чъерами, атъами æмæ æндæртæ. Бынтондæр нæ хъæуы харбыз хæрын, уымæн æмæ уый йæхигъæдæй нæма рæгъæд кæны. Растдæр уый аххосæй рынчындонмæ бахауынц бирæ æмбæстæгтæ. Пайда кæнын хъæуы натуралон адджын донæй, нуазыны æмæ минералон донæй, æрмæст дзы хъуамæ газ ма уа. Туджы æлхъывдад бæрзонд кæмæн у, уыдон хъуамæ дон бирæ ма нуазой, нæ хъæуы пайда кæнын цæхджын æмæ сойаг хæринæгтæй, науæд туджы артериалон æлхъывдад фæбæрзонддæр уыдзæн. Физкультурæйæ архайын хъæуы райсом 8 сахатæй, уазал донæй буар æхсынц æрмæстдæр æнæниз адæймæгтæ. Гипертониктæн æй нæ амонынц, уымæн æмæ уый æвзæрæрдæм бандавдзæн сæ туджы æлхъывдадыл. Уæхи хизут горæтмæ рацæуынæй, рыг кæй у, уый аххосæй, уæлдайдæр та дымгæ бонты.

Æмбæстæгтæ арæх фæтезгъо кæнынц хъæды, стæй цадмæ æввахс дæр æмæ арæх рынчындонмæ бахауынц джыбыты аххосæй. Уыцы рæстæджы æнæмæнгхъæуæг у соматикон рынчындоны хирургион кабинетмæ бацæуын. Уым кæддæриддæр вæййы радгæс дохтыр æмæ уый адæймаджы буарæй аиуварс кæндзæн джыбы.

Адæймаг арæх фæрынчын вæййы ангинæйæ. Уый та баст у, æмбæстаг арæх тынг уазал дон кæй фæнуазы, ууыл. Уымæ гæсгæ адæймаг хъуамæ йæхи хъахъхъæна уазал нуазинæгтæй æмæ ауда йе ‘нæниздзинадыл.

Нæ горæты дзæгъæл куыйтæ арæх кæй хъеллау кæнынц, уый стыр тасдзинад æвзæрын кæны æмбæстæгтæм. Сæрибарæй сæ бон нæу уынгты цæуын, уæлдайдæр изæрыгæтты. Куыдзы хæстæн дохтыры æххуыссы агъоммæ дæр бакæнын хъæуы æххуыс. Цы бынаты фæхæцыд, уый хъуамæ ныхсай сапонæй, стæй æвæстиатæй ацæуын хъæуы дохтырмæ, цæмæй йын сараза судзин æрранизы ныхмæ.

Бæрц зонын хъæуы хæлцæй дæр, уымæн æмæ фырхæрд адæймагыл зынын кæны низтæ – сæр фæриссы, ахсæн ныууæззау вæййы, схизы туджы артериалон æлхъывдад. Фæлтау хæрын хъæуы бон 5 хатты цъустæ, цæйнæфæлтау æгæр бахæрай 2-3 хатты. Ноджы ма стрессы фæстиуæгæн фæзыны бирæ низтæ. Не ‘мбæстæгтыл мæгуырауæрдæм тынг бандæвта гуырдзыйы хæст.

Æнæниздзинад сфидар кæнынæн хорз ахъаз сты Ирыстоны улæфæн бынæттæ «Осетия», «Урсдон», «Сосновая роща», Тæмискъ æмæ Нагутни æмæ сæ хъæуы пайда кæнын.

- Уæдæ адæймагæн æппæты зынаргъдæр у йе ‘нæниздзинад æмæ йæ хъуамæ хъахъхъæнæм, - балхынцъ кодта йæ ныхас Хетæгкаты чызг.

Хуыбиаты Н.