Nog adres

Самал кодтой ног автобустæ

Хуссар Ирыстоны республикон паддзахадон унитарон уагдон «Хуссар Ирыстоны автомобилон транспорты управлени»-йы автопарк баххæстгонд æрцыд аст ног автобусæй. Уый тыххæй ИА «Рес»-æн фехъусын кодта бæлцæттæ æмæ уæзтæласæн хайады хистæр Зассеты Леонид.
«Экономикон рæзты министрад нæ уагдонæн сфæрæз кодта «ПАЗ-3206-110-60» маркæйы цыппар автобусы æмæ «ПАЗ-32054-67» маркæйы цыппар автобусы», - загъта уый.

Йæ ныхæстæм гæсгæ, «ПАЗ-3206-110-60» маркæйы автобустæ бæлцæттæ ласдзысты Ленингор, Дзау æмæ Знауыры районтæм, горæт Къуайсамæ æмæ Цæгат Ирыстонмæ.
«Дыууæ автобусы та архайдзысты Цхинвал-Ленингор æмæ Цхинвал-Цъинагары рейсыты, иу та - Цхинвал-Къуайсайы рейсы. Уый æдтейæ ма, Къуайсайы цæрджыты куырдиатмæ гæсгæ, ноджы иу автобус мах рахи-цæн кæндзыстæм Къуайса-Дзæуджыхъæуы маршрутыл адæмы ласыны тыххæй», - йæ ныхас адарддæр кодта хайады хистæр.
Уый ма йæ ныхасмæ бафтыдта, зæгъгæ, иннæ автотранспортон фæрæзтæ - «ПАЗ-32054-67» маркæйы автобустæ, унитарон уагдон план кæны Цхинвал-Знауыр, Цхинвал-Дзау æмæ горæт Цхинвалы мидæг маршрутты ауадзын.
«Иугай автобустæ мах рахицæн кæндзыстæм Цхинвал-Знауыр æмæ Цхинвал-Дзаумæ рейстæ æххæст кæныны тыххæй, æмæ дыууæ автобусы та арвитдзыстæм Цхинвалы мидгорæтон маршрутмæ», - бамбарын кодта Зассеты Леонид.
Уый банысан кодта, зæгъгæ, автопрак ног автотранспортон фæрæзтæй кæй баххæст, уый фæзындзæн уагдоны куысты эффективондзинадыл.
«Нæ автотранспортон фæрæзтæй бирæтæ базæронд сты æмæ сæ арæх бахъæуы сцалцæг кæнын. Уый та баст у, куыд уæлдай хæрдзтимæ, афтæ бæлццæтты зынвадатдзинæдтимæ, уымæн æмæ-иу автобустæ куы фехæлдысты, уæд-иу сæ ласыны графиктæ нал æххæст кодтой, - загъта хайады хистæр. Уымæ гæсгæ ацы ног автобусты руаджы нæ уагдон кусдзæн уæлдай эффективондæрæй».