Nog adres

АИШ-Ы ПРЕЗИДЕНТÆЙ НОГÆЙ ÆВЗÆРСТ ÆРЦЫД БАРАК ОБАМА

obama_0.JPG
Барак Обама дыккаг цыппаразон æмгъуыдмæ æвзæрст æрцыд Америкæйы Иугонд Штаты президентæй. Уый райста æвзарæг адæймæгты (выборщикты) 303 хъæлæсы. Йæ ныхмæлæууæг Митта Ромнийы æвварс та рахæцыдысты 206. Уыдон кæд официалон зонæнтæ нæма сты, уæддæр республикон партийы минæвар басаст, кæй фембылд, ууыл æмæ раарфæ кодта паддзахады сæргълæууæгæн.
Америкæ сарæзта йæ равзæрст. Барак Обама баззад дыккаг æмгъуыды. Уый райста хъæлæсты хъæуæг бæрц, цæмæй баззайа Урс Хæдзары æмæ йæ куыст адарддæр кæна Вашингтоны. Чикагойы Обамайы æвзæрстыты агъоммæ штабы æгас æхсæв уыдис æцæг бæрæгбон, ныр та æфснайынц сце-нæйы. Обамайы мингай фарсхæцджытæ æр-бацыдысты, цæмæй йын раарфæ кæной йæ уæлахизы тыххæй. Уый уыдис тагъд æмæ сыгъдæг уæлахиз, кæцыйы уайтагъд банымадтой республикæйы ‘мбæстагонтæ.
Обама бузныг загъта, йе 'вварс чи рахæцыдысты, æппæт уыдонæн æмæ ныфс бавæрдта, президенты бынаты уæвгæйæ, цы реформæтæ райдыдта, уыдон адарддæр кæнын.
Америкæйы президенты фæуæлахиз ифтонг кæнынц сæвзæрст адæймæгты коллегийы уæнгтæ. Алы штаты дæр сæ нымæц у алыгъуызон æмæ æвдисы цæрджыты бæрцæй. Коллегийы æдæппæт ис 538 бынаты. Цæмæй Обамæ кæнæ Ромнийæ исчи фæуæлахиз уыдаид, уый тыххæй хъуамæ райстаид 270 хъæлæсы. Обама райста бирæ фылдæр хъæлæстæ.

Куыд æнхъæлмæ кастæуыд, афтæмæй Ромнийæн хъæлæс радта бæстæйы консервативон хуссар хай, централон хайы штаттæ. Йе 'вварс рахæцыдысты Техасы, Хуссар æмæ Цæгат Дакъотæйы, Луизианæйы, Канзасы, Вайомингы, Небраскæйы, Хуссар Каролинæйы.
Демократты тыххæй хъæлæс лæвæрдтой АИШ-ы хурыскæсæн æмæ хурныгуылæн донбылгæрæтты стыр горæттæ æмæ штаттæ. Обама райста сывзæрст адæймæгты хъæлæстæ Кеннектикуты, Мейны, Дэлаверы, Мэриленды, Массачусетсы, сæйраг горæт Вашингтоны Колумбийы округы, Нью-Йоркы, Калифорнийы, Айовы æмæ, кæй зæгъын æй хъæуы, йæ райгуырæн Гавайæты.
Митт Ромни æнæдызæрдыгæй йæхи банымадта фембылдуæвæгыл. Раст у, адæмы размæ уайтагъд нæ рахызт. Раздæр уый фехъусын кодта, кæй бацæттæ кодта æрмæстдæр фæуæлахизуæвæджы раныхас æмæ йæ, æвæццæгæн, бахъæудзæн рæстæг, цæмæй бамбара, йæ фарсхæцджытæн цы зæгъа, уый. Æвæццæгæн, йæ ныхас уыдзæн цыбыр.