Nog adres

Парламенты/ ИРОН МЫГГÆГТÆ - ИРОНАУ

parlament_1.jpg
31 октябры уыд Республикæ Хуссар Ирыстоны Парламенты æхсæзæм сессийы цыппæрæм рабадт. Рабадт уагъта Парламенты Сæрдар Коцты Станислав. Фæсивæд, спорт æмæ туризмы фæдыл парламентон Комитеты сæрдар Плиты Казимир уынаффæмæ рахаста «Республикæ Хуссар Ирыстоны сывæллæтты барты фæдыл сæйраг гарантиты тыххæй» закъоны проект. Закъоны преамбулæйы дзырдæуы: «Ацы закъон æвæры сывæллæтты бартæ æмæ закъонон интересты сæйраг гарантитæ, кæцытæ нысангонд сты Республикæ Хуссар Ирыстоны Конституцийы, сывæллоны закъонон бартæ æмæ интересты реализаци кæныны тыххæй барадон, социалон-экономикон уавæртæ саразыны нысанæн.
Паддзахад сабидуг нымайы адæймаджы царды ахсджиаг этапыл æмæ хатдзæгтæ аразы сывæллæтты æхсæнады æххæстхъом цардмæ приоритетонæй бацæттæ кæныны принциптæй, æхсæнадон нысаниуæг æмæ сфæлдыстадон активондзинадæй, бæрзонд хæрзæгъдаудзинад, патриотизм æмæ æмбæстагдзинады миниуджытыл сæ хъомыл кæнгæйæ».
Закъон æмхъæлæсæй ист æрцыд фыццаг æмæ кæройнаг бакастæй.
Ацы Комитет ма уынаффæмæ рахаста «Республикæ Хуссар Ирыстоны сывæллæтты хæрзæгъдаудзинад æмæ æнæниздзинад бахъахъхъæныны тыххæй» закъоны проект дæр. Закъоны проекты преамбулæйы дзырдæуы: «Ацы закъон, Республикæ Хуссар Ирыстоны Конституцимæ гæсгæ, æмæ «Республикæ Хуссар Ирыстоны сывæллæтты барты бындурон гарантиты тыххæй» закъонмæ гæсгæ бæрæг кæны мадзæлттæ, кæцытæ здæхт сты Республикæ Хуссар Ирыстоны сывæллæтты æнæниздзинад, физикон, интеллектуалон, хæрзæгъдауы æмæ психикон æдасдзинадæй сифтонг кæнын, афтæ ма æвæры, сывæллонæн 18 азы сæххæсты онг цы продукцийæ нæй гæнæн пайда кæнын, уый дих кæныны нормативтæ».

Ацы закъон дæр ист æрцыд фыццаг бакастæй.
Националон политикæ, культурæ, ахуырад, зонад, религи æмæ дзыллон информацион фæрæзты фæдыл парламентон Комитеты сæрдар Цхуырбаты Мирæ уынаффæмæ рахаста «Ирон мыггагон нæмтты тыххæй» РХИ-йы закъоны проект. Уый банысан кодта, зæгъгæ, ацы закъоны проектыл Комитет куыста æртæ азы дæргъы. Ис алыгъуызон экспертон хатдзæгтæ. Закъоныл уынаффæ цыд æхсæнады дæр. Закъоныл кусыны рæстæджы йæм бахаст æр-цыд ивындзинæдтæ æмæ баххæстгæнинæгтæ, хынцыд цыдысты цæрджыты хъуыдытæ дæр. Закъоны текстæй ист æрцыдысты адæймаджы бартæ дæлдзиныг-гæнæг уагæвæрдтæ.
Закъоны преамбулæйы дзырдæуы: «Ирон мыггагон нæмттæ сты культурон бынты объект, истори æмæ культурæйы цыртдзæвæнтæ. Ацы закъон бæстон æмæ бæрæг кæны, раздæры арæзт ахастытæ культурон æргъадты фадыджы, кæцытæн ис ирон адæмы хæдбындурдзинады рæзты нысан. Банысангонд ахастыты хайадисджытæ сты паддзахад æмæ физикон цæсгæмттæ. Ацы закъон æвæры Республикæ Хуссар Ирыстоны æмбæстæгты ирон мыггагон нæмттæ хи бакæнын æмæ ивыны фадыджы барадон архайды бындуртæ, афтæ ма сæ сæвæрын, пайда сæ кæнын, регистраци æмæ хынцын. Закъоны проектыл уынаффæ кæныны хайад райстой депутаттæ Козаты Детоли, Санахъоты Георги, Хъазиты Мелитон, Зæгъойты Никъала, Цхуырбаты Вадим, Диакъонты Амиран, Дзиццойты Юри.
Кæройнаг бакастæй закъоны проект ист æрцыд.
Сессийы рабадты ма хайад райстой Парламенты РХИ-йы Президенты минæвар Уалыты Алык-сандр æмæ Парламенты РХИ-йы Хицауады минæвар Дзуццаты Мурат.
РХИ-йы Парламенты Информацион-аналитикон центр