Nog adres

Аудæм сыгъдæгдзинадыл, рæсугъддзинадыл

251_0.jpg
Иуæй-иу бæрæггæнæнтæм гæсгæ æрвылбон дæр астæуккаг нымадмæ гæсгæ Рукъæй Цхинвалмæ фæндагыл дыууæрдæм фæцæуы 500-600 рог æмæ уæзтæласæн хæдтулгæйæ фылдæр. Бæлццæтты нымæц та ахизы иу мин æмæ æрдæджы бæрцæй. Æппæт домæнтæм гæсгæ фæндаг хъуамæ уа лæгъз æмæ уæрæх, рæсугъд æмæ сыгъдæг, цæмæй æрмæст бынæттон цæрджытæн нæ, фæлæ зæрдæмæдзæугæ уа, цы уазджытæ æрцæуы, уыдонæн дæр. Кæд фæндаджы гъæдæй нæй уыйбæрц рахъастгæнæн, уæддæр афтæ зæгъæн нæй фæндаггæрæтты уавæртæй, йæ сыгъдæг æмæ рæсугъддзинадæй. Ауылты цæуджыты зæрдæ фæндаггæрæттæй хъуамæ рухс кæнид уый бæрц, цæмæй ардыгæй ацæугæйæ ирон адæмæй дзурой æрмæстдæр райгонд æмæ сæрыстыры ныхæстæ.
Зæгъдзынæн уал, фæндагыл цы постытæ ис, уыдоны тыххæй. Сты цыппар. Хуссар Ирыстонмæ тъунелæй рахизгæйæ фыццаг цæст цы чъизи æмæ змæст бынæттыл схæцы, уыдонæй иу у, ам Уæрæсейы æфсадæн цы пост ис, уый. Нæ зонын, хъарагъулы цал æфсæддоны ис, фæлæ фондзæй къаддæр кæй не сты, ууыл нæ дызæрдыг кæнын. Ис сын фаг рæстæг æмæ хорз фадат, цæмæй ныссыгъдæг кæной æмæ бафснайой сæ алыварс. Æз дæр мæ хæс бафыстон Советон Æфсады рæнхъыты æмæ уæд фæтк æмæ сыгъдæгдзинадæн æфсады лæвæрдтой стыр нысаниуæг. Уырнинаг у, æфсæддонтæ ахæм уавæрты кæй ацайдагъ сты, уый æмæ ныр чъизидзинад хатгæ дæр кæй нал кæнынц. Æмбæлы, цæмæй сæ алфæмблай фæткмæ æркæныны тыххæй сын куы æрхъуыды кæниккой сæ цард, архайд æмæ службæйы тыххæй дзуапп чи дæдты, уыцы къухдариуæггæнджытæ.
Катайаг уавæры у, Хуссар Ирыстоны арæнхъахъхъæнджытæн Уæллаг Ручъы цы пост ис, уый алыварс дæр. Сæ кусæн æмæ цæрæн бынаты алыварс алцы фенæн дæр ис (нывы), фæлæ дзы нæй фенæн сыгъдæг æмæ рæсугъддзинадæн, кæд сæйраг бынат уыдон хъуамæ ахсиккой, уæддæр. Бирæ ницы хъæуы аразын, рудзгуытæй алыгъуызон брон æмæ уæлдæйттæ зыгъгъуытт кæныны бæсты сæ брондонмæ куы хæццæ кæниккой, уæд сæм абон уайдзæф дæр не 'рхаудтаид. Нæу диссаг, къуыри иу хатт дæ алфæмбай бафснайын. Ис сын хорз фадат æмæ гæнæнтæ, цæмæй разына сæ къухты фæд, фæлæ хорздзинад саразынмæ, æвæццæгæн, сæ астæутæ тасгæ нæ кæнынц æмæ сæ къухтæ та æгоммæгæс систы.

Сæрмагондæй зæгъын æмбæлы, фæндаджы фæрсты цы хæрæндæттæ арæзт ис, уыдон тыххæй. Кæй зæгъын æй хъæуы, сæ архайд хауы лæггæдты сферæмæ, фæлæ абон ахæм лæггæдтæ ардæм, уазæгуаты чи ‘рцæуы, уыдонæн æнкъарын кæнынц æрдæг æнусы размæйы цард æмæ рæстæджытæ. Абон цард размæ стыр къахдзæфтæ сарæзта æмæ мах ахæм уавæртæ æвдисæм, уый нæу раст. Агъуыстытæ уынæм арæх, афтæ сыл ацахуыр стæм æмæ нæм сæ æгуыдзæгдзинад ницыуал кæсы. Ахæм уавæрты хæрæндæтты, куыдфæнды ма зæгъæм, хæлд фæцæуынц санитарон нормæтæ. Сæ алыварс, дæлбылты кæддæриддæр вæййы брон. Стæй уыйбæрц кæрæдзийыл калд кæй сты, уый дæр нæу раст. Ацы фæндагыл дыууææртæ раны арæзт куы уа нырыккон рæсугъд æмæ сыгъдæг хæрæндоны агъуысты, уæд куыд нæхæдæг, афтæ нæ уазджытæ дæр бирæ райгонддæр уаиккой ахæм лæггæдтæй.
Уанелы автоинспекцийы кусджытæн цы пост ис, уый алыварс аракæс-бакæс кæныны фæстæ адæймаг æнцонæй рахатдзæн, ам сын æндæр, æцæг разамонæг кæй ис, уый. Сæ алæмблай у сыгъдæг æмæ йæ уындæй рухс кæны адæймаджы зæрдæ. Æцæг, уый хуызæн æрдзы хъæбысы бæргæ хуыздæр рафидыдтаиккой ноджыдæр куы бацархайдтаиккой алыгъуызон цъæхдарæнтæй бынат срæсугъддæр кæныныл, уæд. Бирæ бакусын æмæ сæ бацархайын нал хъæуы, цæмæй ахæм рæсугъд æрдзы хъæбысы сæ бынат скæной дзуарбадæны хуызæн.
Бынат сыгъдæг æмæ рæсугъд дарыны тыххæй кæд чысыл уайдзæфы ныхæстæ æмбæлы Гуфтайы автоинспекцийы кусджытæм, уæддæр фæхæцдзынæн мæхиуыл, уымæн æмæ ныфс бавæрдтой, рарастгæнинаг фарстытæ иуварс кæй æрцæудзысты, уый тыххæй.
Фæндаггæрæтты сыгъдæг æмæ рæсугъддзинады тыххæй уайдзæфы ныхæстæ æмбæлы, Рукъæй Цхинвалмæ фæндаджы фæрсты зæххытæ æмæ хæдзæрттæ кæмæн ис, уыдонмæ. Хъуамæ æппæт дæр аразиккой, цæмæй сæ къухты фæд ууылты цæуджыты зæрдæтæм хæссой цины æнкъарæнтæ. Нæу аив, æмбæндтæ æмæ кæртытæ, къухты цы æфты, æппæт уыдæттæй æхгæнын.
ГÆЗЗАТЫ Иван