Nog adres

Театры юбилей нысангонд æрцæудзæн рæстæгыл

Хуссар Ирыстоны драмон профессионалон театрыл æххæст кæны 80 азы. Театр йæхи цæттæ кæны уыцы ахсджиаг бæрæгбонмæ, æрвылбон Профцæдисты хæдзары цæуынц бирæсахатон репетицитæ. Цалдæр боны размæ театры аивадон разамонæг, РХИ-йы сгуыхт артист Бибылты Сослан æмæ нæ уарзон адæмон артист, поэт, депутат Галуанты Людæ дзыллон-информацион фæрæзтæн радтой пресс-конференци.

Бибылты Сослан зæрдиагæй раарфæ кодта журналисттæн, цыбыртæй радзырдта фидæны бæрæгбоны тыххæй. Уый фæстæ Галуанты Людæимæ фарстатæн дзуаппытæ радтой. « Бæрæгбонмæ фæхуыдтам Цæгат Ирыстоны театрты иууылдæр, никæй ферох кодтам. Уыимæ ма æнхъæлмæ кæсæм Абхаз æмæ Приднестровьейы националон театртæм.

- Сæрдыгон мæйты театртæ кæнæ улæфты, кæннод та гастролты вæййынц. Уыцы уавæрты аххосæй уæ коллегæтæн сæ бон куы нæ суа æрцæуын, уымæй тæссаг у. Бæрæгбон та уазджытæй фидауы. Чи зоны, сентябрь кæнæ октябрмæ рахæссын хъуыд бæрæгбон?

Ацы фарстайæн дзуапп дæтгæйæ, Сослан загъта: «Тынг раст фарста у, æцæгдæр ахæм юбилей нысан кæнынæн сæрд бынтон хорз рæстæг нæу. Фæлæ мах принципиалон æгъдауæй рахастам ахæм уынаффæ, цæмæй театры фыццаг профессионалон спектакль цы бон уыди æмæ сценæмæ актертæ цы бон рацыдысты, уыцы бон юбилеон бæрæгбон банысан кæнæм-нæдæр раздæр, нæдæр - фæстæдæр».

Цавæр ивддзинæдтæ æрцыд театры 80 азы дæргъы, зæгъгæ, Сосланы уацхæсджытæй чидæр куы бафарста, уæд фæлмæн йæ мидбылты бахудт æмæ загъта: «Цалдæр эпохæйы, цалдæр фæлтæры аивгъуыдтой… Иу пресс-конференцийы рæстæджы уыдæттæ радзурæн нæй, фæлæ мæ фæнды зæгъын. Хуссар Ирыстоны драмон театр нæ адæмæн цыбыр рæстæгмæ сæ аивадон удлæууæн сси, зæгъгæ, куы зæгъæм, уæд уый уыдзæни историон рæстдзинады хуымæтæг констатаци. Нæ театры куыстой тæмæссаджы актертæ, бирæтæ систы национ аивады æрттивгæ стъалытæ, Куы йæ æрымысын, цавæр актертæ нæм уыдис, цас фæлтæртæ дзы куыста 80 азы дæргъы, цас аивадон уæлахизы бафтыд сæ къухты, уæд æрмæст уыдоны æмрæнхъ æрлæууын, уыдонæн сæ номхыгъдмæ бахауын дæр æз мæхицæн нымайын стыр амондыл, æмæ уыимæ хатын егъау бæрндзинад. Абон, хъыгагæн, æндæр уавæры стæм, фæлæ нæ ныфс нæ асаст. Цыфæнды организаци, цыфæнды фадыджы историмæ куы ‘ркæсæм, уæд бирæты хъысмæты фендзыстæм ахъаззаг къæдз-мæдзытæ. Афтæ у нæ театры истори дæр. Абон мах, хъыгагæн, уыцы къæдз-мæдзхаххон гиперболæйы стæм бынæй. Сындæггай ногæй уæлæмæ цæуæм, бирæ зындзинæдтыл фæуæлахиз уæвын нæ хъæуы, фæлæ ма иу хатт зæгъын – нæ ныфс нæ асаст, нæ рæзты фæндагæй нын азилæн нæй. Ивгъуыды стыр актертæ, режиссертæ, нывгæнджыты цытæн та мах бæрæгбонон программæйы бацæттæ кодтам сæрмагонд блок».

Уыцы фæлтæрты минæвæрттæй абон театры баззад 5 адæймаджы. Сæ куысты сæйраг нысаныл нымайынц кæстæртыл аудын, театралон традицитæ хъахъхъæнын.

- Юбилейон программæйы сусæгдзинæдтæ радзурын уæ нæ домæм, фæлæ нын схематикон æгъдауæй куы бамбарин кæниккат, цавæр равдыст цæттæ кæнут…

- Цыбырæй зæгъдзынæн, кæй дзы уыдзæн æртæ блокы, ома, театры истори чи арæзта, уыдоны тыххæй иу, стæй нæм уыдзæн арфæты сæрмагонд хайад. Кæй зæгъын æй хъæуы, фендзыстут нæхи æмæ нæ уазджыты концертон, музыкалон номыртæ. Æртыккаг блок та у нæ сюрприз театрæн табугæнджытæн, – пресс-конференцимæ интригæ бафтыдта театры аивадон разамонæг.

- Ныртæккæ уæ сценæйыл цæуы æрмæст 5 спектаклы. Уый профессионалон коллективæн æгæр чысыл нымæц у. Фæлæ уын уæ зындзинæдтæ æмбарæм æмæ фæразонæй æнхъæлмæ кæсæм. Кæд æмæ цавæр ног спекталты фæрцы рауæрæх кæндзыстут уæ репертуар?

- Фæззæджы Уæрæсейы Федерацийы Хуссар Федералон зылды хъæппæрисæй райдайдзыстæм Тæбæхсæуты Балойы номыл Цæгат Ирыстоны академион драмон театримæ иумæйаг проектыл кусын. Уый уыдзæн Хетæгкаты Къостайы поэмæ «Фатимæ»-йы бындурыл æвæрд спектакль. Йæ режиссер та у абхазаг Валерий Ковэ. Архайдзысты дзы дыууæ театры актертæ иумæ. Уыдзæн нын фадат куыд Хуссар, афтæ Цæгат Ирыстоны сценæйыл уыцы спектакль æвдисынæн. Проектаразджытæ нын ныфс бавæрдтой, зæгъгæ, уæ иумæйаг спектакль æнæмæнг мæскуыйаг театрдзаутæн равдисдзыстæм. Дыккагæй та октябры мæйы уыдзыстæм Дзæуджыхъæуы уагъдцæуæг фестиваль «Æнæарæнтæ сценæйы» архайджытæ, уырдæм мах аласдзыстæм Лопе де Вегайы пьесæмæ гæсгæ спектакль «Иуæндæсæм фæдзæхст». Нæ режиссер Чилæхсаты Эдуард октябры хъуамæ сæвæра спектакль «Пьесæ №13». РХИ-йы æмæ УФ-йы Культурæйы министрадты бадзырдмæ гæсгæ нын фæззæджы уыдзæн Ярославлы горæтмæ гастролтæ, ома, иу спектакль нæ, фæлæ æппæт репертуар дæр аласдзыстæм уæрæсейаг театрдзауты тæрхонмæ. Зымæгмæ æввахсдæр нæм æрцæудзæн номдзыд режиссер Татьяна Пушнова æмæ сæвæрдзæн Островскийы пьесæ «Банкрот».

Кæй зæгъын æй хъæуы, журналисттæ цымыдис кодтой, Хуссар Ирыстоны Хетæгкаты Къостайы номыл драмон театры æцæг агъуысты хъысмæтыл. Нæ фарстайæн дзуапп радта Галуанты Людæ.

- Мæнæн мæхицæн сæрмагондæй ныфс бавæрдтой, нырма ног театры сценæйыл кæй ахъаздзынæн, уымæй. Уыцы ныфсæй цæрын. Тынг мæ фæнды ногæй уыцы сценæмæ рахизын. Йæ проект цæттæ у. Æхсызгон мын у, историон фасад æнæивдæй кæй баззайдзæн, мидæгæй та иууылдæр уыдзæн нырыккон театралон агъуыстыты хуыздæр домæнтæн дзуаппдæдтæг æмæ стырдæр.

Кæронбæттæны Бибылты Сослан фехъусын кодта, зæгъгæ, республикæйы Хицауад фаг финансон фæрæзтæ радих кодта канд юбилеон бæрæгбонæн нæ, фæлæ театры дарддæры рæзты программæ царды уадзынæн. Æмæ прессæйы минæвæртты фæхуыдта бæрæгбонмæ.

Тæхуды, æмæ театры 85-азон юбилей æнæхъæн дзыллæйæ æцæг театралон агъуысты куы банысан кæниккам. Галуанты Людæ æмæ нæ аивады аргъуаны æппæт артисттæ та куы ахъазиккой уыцы бон сæ хуыздæр спектакль.

Дамбегти Иринæ