Nog adres

ЮБИЛЕЙОН ИЗÆР

ilfip_0.jpg
Цхинвалы Уæрæсейæн цы зонадон æмæ культурон центр ис, уым ауагъд æрцыдис юбилейон изæр, уырыссаг фыссæг æмæ журналист Илья Ильфы райгуырдыл 115 азы сæххæсты цытæн. Мадзал бацæттæ кодтой Россотрудничествойы минæварад Хуссар Ирыстоны ХИПУ-йы уырыссаг æмæ фæсарæйнаг литературæйы кафедрæимæ иумæ.
Литературон изæрмæ æрбацыдысты Россотрудничествойы минæвæрæттæ, ХИПУ-йы лектортæ æмæ студенттæ, афтæ ма Илья Илфы сфæлдыстад йæ зæрдæмæ æввахс кæмæ лæууы, уыдон. Изæр гом кæнгæйæ, Россотрудничествойы къухдариуæггæнæг Михаил Степанов банысан кодта, зæгъгæ, Илья Ильф Евгений Петровимæ иумæ советон литературæмæ бахастой, стыр аргъ кæмæн ис, ахæм хайбавæрд. «Илья Ильф æмæ Евгений Петровы стыр уацмыстæ сæ актуалондзинад нæ фесæфтой сæ фыццаг рауагъдæй абоны онг. Алчи йæ нæ зоны, Илья Ильф æмæ Евгений Петров сæ зынгæ романты йеддæмæ ма кæй ныффыстой бирæ киносценаритæ дæр», - банысан кодта Степанов.
Ацы авторты стыр уацмыстæ - «Двенадцать стульев» æмæ «Золотой теленок» æмæ сæ æнæмæлæт хъайтарты тыххæй æрбамбырдуæвджытæн радзырдта ХИПУ-йы уырыссаг æмæ фæсарæйнаг кафедрæйы сæргълæууæг Пæррæстаты Мананæ.

«Адон сты нæ литературон бынтæ, афтæ ма нæ культурæйы егъау сферæ дæр, кæцыты сфæлдыстой ацы адæймæгтæ. Ацы фысджытæ, куыд антикон титантæ, афтæ сты нæ культурæйы æвварсхæцджытæ æмæ нæ менталитет, сæ фæткæвæрд нæ уæнгты уадзынц хъæлдзæг царды уаг. Ильф æмæ Петров уыдысты бынтон уникалон тандем, кæцы ныууагъта уникалон бын. Уыдон уыдысты фаззæттæ - æфсымæртæ, кæцыты нæй фæхицæнгæнæн.
Юбилейон изæры ХИПУ-йы студенттæ бакастысты фыссæджы цард æмæ сфæлдыстады тыххæй докладтæ, æрæмбырдуæвджыты базонгæ кодтой сæ саразгæ хъайтарты фæлгæндзтимæ, бакастысты ма сын сæ уацмыстæй скъуыддзæгтæ дæр.
Кæронбæттæны та æрæмбырдуæвджытæ бакастысты режиссер Марк Захаровы фильм «12 стульев»-мæ, кæцы ист æрцыдис Ильф æмæ Петровы романмæ гæсгæ.