Nog adres

Йæ профессийыл уыд æнувыд

Адæм кæрæдзийы фæрцы сты, зæгъгæ, æнæхъуаджы нæ фæзæгъынц. Æмæ уый, æцæгдæр, афтæ у. Цас æхцондзинад нын æрхæссы адæймаджы узæлд, рæвдаугæ ныхас куы фехъусæм, уæд. Уæнгтæ фæрог вæййынц, баразæнгард вæййы, йæ разы цы хæстæ æрæвæрдта, уыдон æнтысгæйæ аскъуыддзаг кæнынмæ.
Фæлæ дзы уæддæр дохтыры аудгæ ахаст, фæлмæн дзыхы дзырдæн æмбал нæй. Æрмæст йæ иу фендæй дæр рынчын йæхи хуыздæр банкъары, цыма йæ низ æрбайсæфт, афтæ йæм фæкæсы. Иудзырдæй, йæ ныфс æмæ цард дарддæргæнæг ын свæййы æмæ йæм фæкæсы райгæ цæстæнгасæй.
Дохтыры арфæйаг æмæ бæрнон професси бауарзта Къостайыхъæуы цæрæг Гæбæраты Оля. Скъолайы ма куы ахуыр кодта, уæд скъуыддзаг уыд йæ фидæны дæсныйад. Фæлæ хорз специалист райсынæн æнæмæнхъæуæг сты скъолайы ахуыры рæстæджы хорз зонындзинæдтæй хи схотыхджын кæнын. Æрыгон чызг рæвдз уыд ахуырмæ, æдзухдæр чингуытæм æхсайдта йæ зæрдæ. Раззагон ахуыргæнинаг кæй уыд, уымæн дзы уыдысты райгонд йæ ахуыргæнджытæ. 1952 азы Къостайыхъæуы астæуккаг скъола каст фæци хорз æмæ тынг хорз нысæнттыл. Райдианы уал бакуыста хъæууон библиотекæ æмæ клубы сæргълæууæгæй.

Фæлæ йæ зæрдæ æхсайдта йæ равзæрст дæсныйадмæ æмæ 1956 азы каст фæци Сталиниры медтехникум. Астæуккаг медицинон ахуырад райсыны фæстæ 10 азы медицинон хойæ бакуыста горæты поликлиникæйы. Зæгъын хъæуы уый, æмæ ацы уагдоны кусгæйæ, кæй райста хорз практикон цæттæдзинад. Йæ хъус дардта фæлтæрд дохтырты архайдмæ æмæ сæ биноныг кодта йе 'рвылбонон куысты. Рынчынтæм ын уыд уæздан ахаст æмæ сын кодта æмбæлон медицинон æххуыс. Фæлæ Гæбæраты чызджы фæндыд фылдæр зонындзинæдтæ райсын æмæ уыцы нысанæн 1966 азы сси Цæгат Ирыстоны паддзахадон мединституты студенткæ. Ныр тынгдæр базыдта, медицинæйы цас бирæ сусæгдзинæдтæ ис, уый. 1973 азы институт куы бакаст, уæд кусын райдыдта Грознæйы горæты дыккæгæм рынчындоны. Ирон чызджы тынг бауарзтой амы цæрджытæ, се 'нæниздзинадмæ сын йæ хъус лæмбынæг кæй дардта, уый тыххæй.
Ныййарæг зæхх адджын у æмæ иу азы фæстæ ратагъд кодта йæ райгуырæн къуыммæ. 1974 азы кусын райдыдта Дзауы санаторийы æмæ æмбæстæгтæн лæггад кодта, цалынмæ зæххæнкъуыст нæ уыд, уæдмæ. Æмæ кæцæй нæ цыдысты улæфынмæ ацы алæмæттаг къуыммæ. Æнæмæнгдæр, нæ раздæры Цæдисы алы кæрæттæй. Æнæхъуаджы нæ дзырдæуы, мыййаг, зарæджы ныхæсты:
«Дзауы фенынмæ,
Дзаумæ улæфынмæ
Мæскуыйæгтæ дæр
Арæх æрцæуынц, гъей!»

Ирон адæм фыдæлтæй фæстæмæ уазæгуарзон сты. Æмæ уыцы уарзт санаторийы сæйраг дохтыр Хетæгкаты Маринæ æмæ дохтыр-хосгæнæг Гæбæраты Оля дæр кад æмæ радимæ хъахъхъæдтой. Æмæ канд уый нæ, фæлæ сын алы æмбæстагмæ дæр уыд уæздан ахаст, аудыдтой сын се 'нæниздзинадыл. Уый фæстиуæгæн-иу ардæм иу хатт чи æрцыд, уый-иу æнæмæнг фæзындаид 2-3 хатты дæр. 1993 азæй та Оля кусын райдыдта Хуссар Ирыстоны Хъахъхъæнынады министрады поликлиникæйы. Ныр-тæккæ ис пенсийы.
Адæймаг царды хорз фæд куы ныу-уадзы, уæд дзы кæддæриддæр бузныг вæййынц æмбæстæгтæ, свæййы сын уарзон æмæ адджын. Къаддæр æхцондзинад нæ фæисы йæхæдæг дæр, хорздзинад тауын сын йæ бон кæй бавæййы, уымæй. Раст ахæм лæг-гадгæнæгыл банымайæн ис Гæбæраты Оляйы дæр.
ХУЫБИАТЫ Н.