Nog adres

Æрæвналдзысты тауынмæ

chum.jpg
Æрбалæууыд фæззыгæнд мæнæу тауыны ахсджиаг рæстæг æмæ йæм нæ республикæйы хæдзарадтæ дæр æввахс бонты æрæвналдзысты. Зæгъын хъæуы уый, æмæ фарон ацафон хуым кæныны куыстытæ цыдысты рæвдздæр, уæд сын бантыст 700 гектары мæр афæлдахын. Уый зæгъæн нæй ныртæккæ, уымæн æмæ дæргъвæтин рæстæг къæвдайы æртах нал æрхауд æмæ мæр у тынг хъæбæр.
Уый та къуылымпыйы хос у хуым кæнын æмæ тауыны куыстытæ афоныл ахицæн кæнынæн. Механизаторты агрегаттæ цъæл кæнынц хуым кæнгæйæ, сæ хæрдзтæ та сты дзæвгар. Фæлæ уæддæр, уымæ нæ кæсгæйæ, «Агропромсервис»-ы æртæ механизаторы Уелиты быдырты кусынц хъаруджынæй æмæ уал сын бантыст 160 гектары мæр бахуым кæнын.
Уым фæззыгæнд мæнæу хъуамæ байтауой ацы бонты. Аунеуы быдыры та фермерон хæдзарад хæрзгъæд тауинаг байтыдта 80 гектары фæзуатыл.
Цхинвалы районы Къостайыхъæу æмæ Тъбеты хæдзарадтæ уал мæр бахуым кодтой 100 гектары æмæ уыдон дæр фæстæ нæ фæлæудзысты тауыны куысты. Присы хъæуы “Агропромсервис”-ы механизатор Мамытаты Тариел бахуым кодта 30 гектары, культиваци та йæ бакодтой Лолоты Гиви æмæ Сагкаты Илья.

Техникæйы цухдзинад æнкъардæуы Цъинагары зонæйы. «Агропромсервис»-ы директор Мамытаты Уахтъанг куыд банысан кодта, афтæмæй уыдонæн дыууæ хъомысджын хуымгæнæн тракторы куы уаид, уæд сæм хуым кæныны æмæ тауыны куыстытæ цæуиккой тынг рæвдз. Орчъосаны хъæуы дæр æрæвнæлдтой хуым кæнынмæ æмæ уал сын абонмæ бантыст 70 гектары мæр афæлдахын. Хæдзарадтæ фаг ифтонг сты хорз, хæрзгъæд тауинагæй.
Механизаторты ныфс ис, иу къуыримæ 200 гектары фæззыгæнд мæнæу кæй байтаудзысты, уымæй.
ХУЫБИАТЫ Н.