Nog adres

Сæххæст кодта сабиты фæндон

pianino_0.jpg
Республикæ Хуссар Ирыстоны Президент Тыбылты Леонид æмæ уæрæсейаг æхсæнведомствойон кусæгон къорд Уæрæсейы Федерацийы Æдасдзинады советы секретары хæдивæг Рашид Нургалиевы сæргълæудæй ацыдысты Знауыры районмæ.
Балцы хайадисджытæ бабæрæг кодтой сывæллæтты рæвдауæндон æмæ уæрæсейаг арæнхъахъхъæнджыты хайад Знауыры райцентры.
Поселочы ма фембæлдысты районы цæрджытимæ.
«Уæ район абон исы йæ раздæры хуыз, цард хуыздæр кæны поселочы», - загъта Президент фембæлды рæстæджы.
Поселочы сывæллæтты рæвдауæндонæн Рашид Нургалиев балæвар кодта пианино. Уый банысан кодта, зæгъгæ, сæххæст кодта сывæллæтты бæллиц.
«Мах фыццаг хат ам куы уыдыстæм, уæд сымах загътат, зæгъгæ, хорз уаид пианино нын куы уаид. Ныр дзы пайда кæнут, уадз, уæ сывæллæттæ байрæзæт æмæ зонæт сæ адæмы сфæлдыстад. Сæйраг у, цæмæй сомбон уыдон уой амондджын адæм», - загъта Нургалиев.
Рæвдауæндоны сæргълæууæг Икъоты Аидæ рæвдауæндоны хъомылгæнджытæ æмæ ныййарджыты номæй арфæ ракодта Нургалиевæн зынаргъ æмæ зæрдылдарæн лæвары тыххæй.
Республикæйы сæргълæууæг бацымыдис кодта уагдоны кусджыты проблемæтæм.
«Сывæллæтты цæхæрадон ифтонг у куыд уазал, афтæ хъарм донæй дæр, ис дзы 70 сывæллоны.

Хъыгагæн, Терегуаны хъæуы нæй сывæллæтты цæхæрадон æмæ мах курæг стæм, цæмæй нын рахицæн кæной транспорт, цæмæй сывæллæтты ласæм нæ цæхæрадонмæ», - загъта Икъоты Аидæ. Уый ма бахатыд, цæмæй аскъуыддзаг кæной сывæллæттæн хъазæн фæзуат саразыны фарст.
Дарддæр делегаци базонгæ ис уæрæсейаг арæнхъахъхъæнджыты службæйы уавæртимæ. Балцы хайадисджытæ бацымыдис кодтой Знауыры фæндаджы арæзтадмæ. Нургалиев банысан кодта, зæгъгæ, йæ фыццаг æмæ абоны балц «кæрæдзийæ бæрæг хицæн кæнынц, куыд æхсæв æмæ бон».
«Мæнæн æхсызгон у, æнтыстдзинæдтæ уæ къухы кæй æфты, уый», - загъта Нургалиев.