Nog adres

Гуырдзыстон дарддæр кæны йæ провокацион архайдтытæ

DSC02331_1.JPG
Нæ республикæмæ та радон хатт фæуазæг сты женевæйаг дискусситы æмсæрдæрттæ Евроцæдисæй Филипп Лефор, ЕÆÆО-йæ Подриг Мэрфи, Иугонд Нациты Организацийæ Анти Турунен æмæ æндæртæ.
Хуссар Ирыстоны фарсæрдыгæй бадзырдты процессы хайадисджытимæ фембæлды райдианы Фæсконфликтон хъаугъатæ æрнывыл кæныны фæдыл Президенты цур æххæстбарджын Джиоты Мурат банысан кодта, дискусситы æмсæрдæртты кусæгон балц кæй фæахъаз уыдзæн регионы дарддæры æдасдзинад бахъахъхъæнынæн æмæ банысан кодта ацы аз 18 июлы сæ фембæлдæй фæстæмæ регионы уавæр стабилон кæй у.

«Фæлæ нæй афтæ зæгъæн, æмæ нæ къухы стыр æнтыстытæ бафтыди. Арæх паддзахадон арæны фæтк фехалынц хуымæтæг æмбæстæгтæ. Арæнхъахъхъæн-джытæ ацы цаутæм сæ цæст лæмбынæг дарынц, арæны фæткхалджытæ фæдзæхст æрцæуынц æмæ æрвыст æрцæуынц сæ хæдзæрттæм», - загъта Джиоты Мурат.
Президенты цур æххæстбарджын минæвар ма лæмбынæг æрдзырдта инциденттæ ма æруадзын æмæ сæ аиуварс кæныны механизмты фембæлдтыты фæлгæтты дзырд кæй цыд, Хуссар Ирыстоны арæнгæрон гуырдзиаг хъæу Зардиаты хъæуы цы гуырдзиаг милицийы пост æвæрд æрцыд, ууыл.
«Кæд активонæй æрдзырдтам ацы проблемæйыл, уæддæр фарст скъуыддзаггонд не 'рцыд. Милицийы пост дарддæр ис йæ бынаты æмæ нæм æрвыл къуыри дæр хъæуы цæрджытæ æрбацæуынц сæ тыхстдзинæдтимæ.

Пост фыццаг бонты æвæрд куы æрцыд, уæд сын цæрджытæм фæлмæндæр ахаст уыд, фæлæ абоны бон хъæуы цæрджытæ æнкъарынц гуырдзиаг полицийы уæвынад. Арæхæй арæхдæр сын цæуынц сæ кæртытæм æмæ хъæуы цæрджытæн сæ бон сæрибарæй змæлын нæу. Тынг уæм хатын, цæмæй ацы фарст ногæй æрæвæрат Гуырдзыстоны къухдариуæгады раз», - банысан кодта Мурат.
Джиоты Мурат куыд загъта, афтæмæй Хуссар Ирыстоны барадхъахъхъæнæг органтæ рахатыдысты республикæйы арæнгæрон гуырдзиаг æфсады змæлд æмæ уый тыххæй не 'мбæстæгтæ тыхсынц. Дискусситы Евроцæдисæй æмсæрдар Подриг Мэрфи куыд загъта, афтæмæй сын тынг ахсджиаг у бадзырдты процессы æппæт фарстатыл дæр æргомæй æрдзурын.
«Нæ иумиаг нысан у хæстон конфликт мауал æруадзын æмæ адæмы ахæм тасæй бахизын», - банысан кодтиа Мэрфи.
Мэрфи куыд загъта, афтæмæй æмсæрдæрттæм ис цалдæр фæндоны æдасдзинад бафидар кæныны æмæ Женевæйы дискусситы кусæгон къордты архайд фæактивондæр кæныны тыххæй. Дарддæр фембæлд ацыд æнæ массон информациты хайадистæй.
Чысыл фæстæдæр Республикæйы сæргълæууæг Тыбылты Леонид йæхимæ райста фембæлды хайадисджыты.
Бæстæйы сæргълæууæг банысан кодта, зæгъгæ, Женевæйы дискусситы фæлгæтты куыст æнæмæнгдæр хъæуы адарддæр кæнын, уымæн æмæ уый у политикон фæзуат, у Медведев-Саркозийы бадзырд реализаци кæнын æмæ кæрæдзи æмбарынадæн.
«Дискусситы сæйраг нысан у дыууæ фарсæрдыгæй дæр юридикон æгъдауæй документ бафидар кæнын хæстон архайдтытæй мауал спайда кæныны тыххæй. Хуссар Ирыстоны фарс рагæй у разы ацы хъуыддагыл æмæ дзæвгар хæттыты бавдыста æмбæлон документы проект. Мах ныфс ис ацы документыл къухтæ кæй бафыстæуыдзæн»,- загъта Тыбылты Леонид.
Президент стыр бузныг загъта делегацийы сæргълæууæг Филипп Лефорæн Зардиаты хъæуы сæвзæргæ уавæрмæ йæ ахасты тыххæй. Леониды хъуыдымæ гæсгæ фарст аскъуыддзаг кæнын хъæуы бадзырды фæрцы. Бæстæйы сæргълæууæг делегацийы уæнгтæн стыр бузныг загъта горæт Цхинвалы цæгатфарс уæвæг хъæутæм хауæг фарстаты тыххæй æмбарындзинад кæй равдыстой, уый тыххæй.
«Сымах æй зонут, ам кæй цардысты куыд гуырдзиæгтæ, афтæ ирæттæ дæр æмæ сæ сыгъдæг гуырдзиаг хъæутыл банымайæн нæй, цард сæ 30-40 проценты онг ирон цæр-джытæ. Ацы хъæутæ ныппырх сты 2008 азы хæсты рæстæджы æмæ сæ гуырдзиаг хъæутæ хонын райдыдтой 1990 азтæй фæстæмæ. Уыцы азты сырд æрцы-дысты ирон адæм. Уы-дон абоны бон нымад цæуынц лигъдæттыл æмæ æнæ барæй йæ цæрæнуатæй лидзинаг чи фæцис, ахæм адæ-мыл. Се 'хсæн сты ирæт-тæ дæр æмæ гуырдзиæгтæ дæр æмæ мах хæсджын стæм уыцы адæмæн нывыл цæрæн фадæттæ саразын. Мах ацы ахсджиаг фарстатыл куы фæдзурæм, уæд гуырдзиаг къухдариуæгады никуы бафæнды нæ бамбарын. Кæцыфæнды паддзахад дæр архайы йæ территоритæ аразыныл æмæ мах уый куы саразæм, уæд уыцы бынæттæм æрхондзыстæм æнæ барæй йæ цæрæнуатæй лидзинаг чи фæци æмæ абон Хуссар Ирыстоны чи ис, уыцы адæмы», - загъта Тыбылты Леонид.
Президент ма куыд загъта, афтæмæй Хуссар Ирыстоны къухдариуæгады номыл æрбарвыстæуыд, раздæр ацы хъæуты чи цард, уыдонæй 461 куырдиаты.
«Уыдон нæм хатынц, цæмæй сын баххуыс кæнæм, цæрæнуæттæй сæ сифтонг кæныны хъуыддаджы. Æмæ уый та ууыл дзурæг у, æмæ æмбæлон дыууæ мин адæй-маджы кæй тыхсынц æмæ сын кæй хъæуы нывыл цæрыны фадæттæ саразын».
Тыбылты Леонид сын сæ хъусдард аздæхта, ныппырхгонд хъæуты историон цыртдзæвæнтæм æвнæлд кæй не 'рцыд æмæ сæ бон кæй уыдзæн Тиры моладзандонмæ цæугæйæ æппæт дæр сæхи цæстæй фенын.
«Уыдонæн хъахъхъæд æрцыд се 'ддаг хуыз, хæсты размæ куыддæриддæр уыдысты, ахæмæй. Æмæ Хуссар Ирыстоны къухдариуæгад бацархайдзæн уыцы историон цыртдзæвæнтæ бахъахъхъæныныл. Цадæггай сæ æркæндзыстæм æмбæлон уагмæ. Мах нæхи нæ дарæм варвартау, Гуырдзыстоны раздæры паддзахадон советы сæрдар Эдуард Шеварднадзейау. 1992 азы Зары фæндагыл Гуырдзыстон фæцагъта сылгоймæгты, сабиты æмæ зæрæдты. Ереды фæндагыл та удæгасæй баныгæдтой цалдæр ироны. Æрхъуыды-иу ын кæнут ацы трагедитæ æмæ йын зæгъут, Хуссар Ирыстон алы хатт дæр фидыдадмæ тырныдта», - банысан кодта бæстæйы сæргълæууæг.
Уымæй дарддæр ма Тыбылты Леонид фехъусын кодта Гуырдзыстоны фарс йæхи серьезонæй кæй цæттæ кæны хæстон æгъдауæй.
«Махмæ ис серьезон информаци Гуырдзыстоны ныртæккæйы фæндæтты тыххæй, сæрмагондæй та Ленингоры районы территоримæ хæстæг Гуырдзыстоны хъахъхъæнынады министрад кæй аразы хотыхтæ æвæрæн æфтауцдæттæ», - банысан кодта Тыбылты Леонид.
Республикæйы сæргълæууæджы ныхæстæм гæсгæ, æппæт ацы мадзæлттæ арæзт кæй цæуынц Хуссар Ирыстоны адæмы ныхмæ.
«Æппæт ацы азты дæргъы мах архайдтам нæ паддзахады арæзтадыл æмæ æндæр бæстæтимæ хæларадон æмахастытыл. Мах æрвылхатт дæр стæм æмæ уы-дзыстæм фидыдады фарс. Хæст хорз фæстиуджытæм никуыма никæй æркодта, дыууæ фарсæрдыгæй дæр фæцагъды вæййынц адæм. Ныр хотыхтæй архайыны афон нæу æмæ Гуырдзыстоны фарсæрдыгæй цы провокацион архайдтытæм ис æнхъæлмæ кæсæн, уыдон тыххæй та бæрндзинад хæсдзæн сæ къухдариуæгад», - фехъусын кодта Президент.
Евроцæдисы æмсæрдар Филипп Лефор банысан кодта æвæрццагыл кæй нымайы, Президент Гуырдзыстоны фарсæрдыгæй цы провокацион архайдтытыл æрдзырдта, уыдоны. Филипп Лефор ма фæцагайдта Хуссар Ирыстоны статусы фарстмæ дæр æмæ банысан кодта уайтагъд æй принципиалон æгъдауæй аскъуыддзаг кæнæн кæй нæй. Уый тыххæй ис ныхмæвæрд позицитæ.
Уый фæстиуæгæн Президент Тыбылты Леонид фехъусын кодта, Хуссар Ирыстон 22 азы агъоммæ аскъуыддзаг кодта йæ фæндон æмæ йе статусы фарст дæр скъуыддзаггонд кæй у.
«Уæдæй фæстæмæ сырæзт æнæхъæн фæлтæр, кæцытæ цæрынц хæдбар банымадгонд Республикæйы æмæ уый хынцинаг у», - кæронбæттæны загъта Президент.
Фембæлды фæстæ фæсхъаугъайон уавæр æрнывыл кæныны фæдыл Президенты цур æххæстбарджын Джиоты Мурат журналисттæн фехъусын кодта, зæгъгæ, дискусситы æмсæрдæртты фембæлды ахсджиаг хъусдард аздæхтæуыд Хуссар Ирыстоны арæнгæрон гуырдзиаг постытæ æвæрд æмæ фидаргонд кæй цæуынц, уыцы фарстмæ.
«Кæй зæгъын æй хъæуы ацы уавæртæ махмæ тыхстдзинад æвзарын кæнынц. Мах хорз бахъуыды кодтам Гуырдзыстоны фарсы аивгъуыйгæ хъуыддæгтæ, бæрæгбонты нын-иу цы провокацион архайдтытæ сарæзтой, уыдон», - загъта Джиоты Мурæт.
Уый ма фехъусын кодта, зæгъæ, 24 сентябры уагъд кæй æрцæудзæн инциденттæ ма æруадзын æмæ сæ аиуварс кæныны фæдыл механизмты фæлгæтты радон фембæлд æмæ дзы дзырд цæудзæн Гуырдзыстоны ахæстæтты уæвæг æмæ не 'мбæстæгтæй æбæрæгæй сæфтыл нымад чи цæуы, уыдон хъысмæты æмрæнхъ дзырд кæй цæудзæн Зардиаты хъæуы уавæрыл дæр.
Уый фæстæ делегацийы уæнгтæ ацыдысты æмæ бынаты федтой Тиры моладзандон æмæ горæт Цхинвалы цæгатфарсы уæвæг хъæуты уавæр.
КОКАЙТЫ Заринæ