Nog adres

Уынг ивы йæ хуыз

DSCF2440.jpg
Нæ горæты егъаудæр уынгтæй иу у Джиоты Аланы (Ленины) уынг. Ныртæккæ ацы ран Мæскуыйы уынгæй суанг Тæболты Сергейы уынджы онг змæлынц кусджытæ, техникæ. Ацы арæзтад ис бынæттон фирмæ «Сарматспецстрой»-ы бæрны.
Уынджы фæйнæ фарс тротуартæ аразыныл кусынц дыууæ бригадæйы æмæ сæ архайдæй бæрæг у, цæсгомджынæй кæй æххæст кæнынц сæ разылæууæг хæстæ. Иу бригадæйæн дзы разамынд кæны Узбекистанæй æрцæугæ Макуд Таджиев æмæ йæ бригадæйы уæнгтæ æдæппæт сты 13 адæймаджы. Уыдон сæ куыст райдыдтой 10 августы æмæ уал сын бынтыст, йæ уæрæх 3,70 метры кæмæн у, ахæм тротуар 150 метры дæрддзæгæн плиткæйæ бамбæрзын. Бригадир куыд загъта, афтæмæй куыстытæ цæуиккой рæвдздæр, арæзтадон æрмæгæй рæстæгыл ифтонг куы цæуиккой, уæд.
Кусджыты иннæ хай сæйраг фæндаг аразынмæ æрæвнæлдта 10 июлы. Райдианы дзы æххæст кодтой сыджыт къахыны куыстытæ, фæлæ фæстæдæр куыстытæ урæд æрцыдысты рæстæгмæ, Санкт-Петербурджы кæцыдæр компанийы проект фидаргонд кæй не 'рцыд, уый аххосæй. Хъуыддаг уый мидæг уыд, æмæ уынджы уæрæх хъуамæ уыдаид 15 метры, бынæттон Хицауады та фæндыд, цæмæй аххæссыдаид 18 метры онг. Фæлæ афтæ бакæнгæйæ, уынджы кæрæтты цы бæлæстæ ис, уыдон ракалдтаиккой. Фæстæдæр æрлæууыдысты ахæм фæндоны фарс, цæмæй йæ уæрх баззадаид 16 метрæй чысыл фылдæр. Фæндаджы арæзтады мастер Ароян Ашот куыд банысан кодта, афтæмæй сæ тынг хъыг дары коммуникацион хæххыты арæзтад. Уыдоны хъаруджын æмæ æнæзæрдæхудт куыстыл баст уыдзæн ацы фирмæйы æнтысгæ архайд дæр.
Уæдмæ нæ уæлхъус æрбалæууыд сæйраг инженер Алексей Бабинцев æмæ ма ацы арæзтады тыххæй бафтыдта:

- Республикæ Хуссар Ирыстоны арæзтад æмæ архитектурæйы министрад ацы уынджы тыххæй сарæзтой проект. Кæй зæгъын æй хъæуы, ацы проект фидар куы æрцæуа, уæд уынджы хуыз æмæ аивдзинад дзæвгар фæхуыздæр уыдзæн. Уынджы астæу сырæздзæн газон æмæ афтæмæй дыууæ дихы фæуыдзæн. Транспорты иу хай цæудзысты иуæрдæм, иннæтæ та - иннæрдæм. Уый стыр ахъаз уыдзæн, фистæгæй чи цæуа, уыдон æдасдзинадæн. Финанс кæныны хъуыддаг кæд нывыл уа, уæд асфальт кæныны онг æппæт куыстытæ сæххæст кæндзысты иууыл фылдæр - мæй æмæ æрдæгмæ.
Хуыр у сæйраг ацы арæзтадæн. Сбæрæг ын кодтой йæ гъæд æмæ у тынг хорз пайда кæнынæн. Уынджы арæз-тады фæллой кæны 40 кусæгæй фылдæр, техникæйы нымæц та у 20 иуæджы.
ХУЫБИАТЫ Н.