Nog adres

РХИ-йы ПРЕЗИДЕНТ ФЕМБÆЛД ХУССАР ИРЫСТОНЫ ВЕНЕСУЭЛÆЙЫ МИНÆВАРИМÆ

tibilov_4.jpg
Республикæ Хуссар Ирыстоны Президент Тыбылты Леонид йæхимæ райста Хуссар Ирыстоны Боливариаг Республикæ Венесуэлæйы уæлвæткон æмæ æххæстбарджын минæвар Уго Хосе Гарсиа Эрнандесы. Æппæт ирон адæмы номæй паддзахады сæргълæууæг арфæйы ныхæстæ загъта уазæгæн æмæ йæм бахатыд, цæмæй иууыл хуыздæр фæндиæгтæ зæгъа Венесуэлæйы президент Уго Чавесæн.
«Ныфс нæ ис, кæй йын ратдзыстут фидар æнæниздзинад æмæ президентон æвзæрстыты уæлахизы фæндиæгтæ.
Æз райгонд дæн, махæн уæлдай нысаниуæг цы августы бонтæн ис, уæд кæй фембæлдыстæм», - банысан кодта Тыбылты Леонид.
Уазæгæн фехъусын кодта, зæгъгæ, 7-8 августы Хуссар Ирыстоны ныхмæ гуырдзиаг агрессийыл цыппар азы сæххæсты бонты уагъд кæй цыдысты мысæн мадзæлттæ: «26 августы та нысан кæндзыстæм, Уæрæсе нын нæ республикæйы хæдбардзинад куы банымадта, уыцы нысаниуæгджын бон».
Дарддæр Президент загъта, зæгъгæ, Хуссар Ирыстоны адæм стыр аргъ кæнынц Венесуэлæ æмæ Хуссар Ирыстоны 'хсæн ахастытæн æмæ дарддæр дæр архайдзысты сæ райрæзын кæныныл.
Йæ рады Уго Хосе Гарсия Эрнандес банысан кодта, Венесуэлæйы дæр кæй хъуыды кæнынц 2008 азы августы цаутæ æмæ æмбарынц, Хуссар Ирыс-тонæн ацы бон цас ахсджиаг у, уый.
«Уæрæсе Хуссар Ирыстоны паддзахады хæдбардзинад куы банымадта, уæд Уго Чавес бирæ нæ хъуыдыкæнгæйæ бафæзмыдта Уæрæсейы», - загъта минæвар.
Уый ма хъусдард аздæхта, Хуссар Ирыстоны цы æвæрццаг процесстæ цæуы республикæйы царды уавæртæ фæхуыздæр кæныны тыххæй, æппæт уыдонмæ. Бамбарын ма кодта Уго Чавесы æнæниздзинад йæ уагыл кæй нæ уыд æмæ Венесуэлæйы æрлæугæ æвзæрстыты фæстиуæгæн бæстæ цыбыр рæстæгмæ кæй æрурæдта йæ дунеон ахастытæ æрмæст Хуссар Ирыстонимæ нæ, фæлæ æндæр бæстæтимæ дæр.

«Махæн, ахсджиаг у, цæмæй дунеон æмæхсæнад бамбарой, нæ æвзæрстытæ демократон æмæ сæрибар уавæрты кæй уадзæм», - загъта минæвар.