Nog adres

Тъбеты хæдзарады

chatva.jpg
Хъæбæрхоры тыллæг æфснайы Цхинвалы районы «Тъбет»-ы фермерон хæдзарад дæр. Ацы культурæйæ сын æдæппæт бафснаинаг ис 23 гектары æмæ йыл «Агросервис»-ы комбайнертæй дыууæйæ кусынц. Уыдон кусынц хъаруджынæй æмæ сын бантыст дзæвгар æркæрдын. Хуры цæст ма чысыл къахырæй зынд, афтæ балæууыдтæн хоркуыстгæнджыты цур. Уæдмæ сызгъæрингъуыз хойрагæй байдзаг Кокойты Димайы комбайны бункер æмæ æр-лæууыд. Йæ цуры балæууыд Бибылты Вячеславы лафетджын трактор æмæ уысммæ айдзаг. Уый йæ фæндаг акодта, хор кæм æфснайынц уыцы мæнгагъуыстмæ.
Фермер Бибылты Владимир куыд загъта, афтæмæй æфснайд фæуыдзысты æввахс бонты. Развæлгъау банымадмæ гæсгæ гектарон тыллæгæарзады бæрæггæнæн у 17 центнерæй фылдæр. Иугæр тыллæг карст куы фæуа, уæд та æрæвналдзысты хъæмп пресс кæнынмæ. Ууыл бакусдзысты фермертæ сæхæдæг - Бибылты Владимир, Цхуырбаты Иван æмæ Гаглойты Алан. Ис сын, цæмæй бакусой, ахæм техникæ.