Nog adres

Нæ цины дæр, нæ хъыджы дæр немæ ис уæрæсе

P8081177.JPG
8 августы Республикæ Хуссар Ирыстон банысан кодта 2008 азы Гуырдзыстоны агрессийы цыппар азы бон. Ацы аз кæд трагикон цаутæ мысæн бон уыд, уæддæр æй бахъуыды кæндзыстæм ноджыдæр мысæн бонæй. Ацы уæззау бон нæ рис немæ адих кæнынмæ Хуссар Ирыстонмæ æрцыд Уæрæсейы Федерацийы минæварджын делегаци Хицауады Сæрдар Дмитри Медведевы сæргълæудæй.
Кадджын уазæгыл Хицауады хæдзары раз сæмбæлдысты ирон æгъдаумæ гæсгæ æртæ уæлибых æмæ дзаггарзимæ. Бафæдзæхстой йæ Ирыстоны зæдтæ æмæ дзуæрттæн.

Республикæ Хуссар Ирыстоны Президент Тыбылты Леонид официалон фембæлды банысан кодта, æхсызгонæй кæй æмбæлынц Дмитри Медведевыл.
«Цыппар азы размæ Хуссар Ирыстонмæ æрбабырстой знаджы хотыхджын æфсад. Цыбыр рæстæгмæ Ирыстоны уыйбæрц уæззау æхсæнгæрзтæй æхстой, кæцы нæ федта адæймагад. Фæмард сты сæдæгай адæймæгтæ, фыдыбæстæ хъахъхъæнджытæ, фидауынгæнæг тыхты ирон æмæ уырыссаг батальонты хæстонтæ. Æмæ цас уыдаиккой ацы хæсты амæттæгтæ, Уæрæсейы Федерацийы къухдариуæгад æмбæлон уынаффæ куынæ райстаид æмæ агрессоры сабырадмæ куынæ æркодтаид, уæд. Уый уыд дæ уынаффæ æмæ уыдис раст уынаффæ. Уымæн дыл æхсызгонæй æмбæлынц Хуссар Ирыстоны æппæт адæм. Махæн æхсызгон у, кæй нын ис стыр Уæрæсе. Бузныджы ныхæстæ дзурынæй мах нæ фæллайæм Уæрæсейы бæрзонд къухдариуæгады номыл, дæ номыл.
Уæрæсейы Федерацийы Президент Владимир Путинимæ Сочийы фембæлды æз баныфсæвæрдтон, Хуссар Ирыстоны мах кæй сараздзыстæм æппæт дæр, цæмæй сæндидза йæ кæддæры ном Уæрæсейы къухдариуæгад æмæ адæмы цæсты. Хуссар Ирыстоны ног къухдариуæгад та сараздзæн æппæт дæр, Уæрæсейæ цы стыр æххуыс цæуы, царды æмвæзад фæбæрзонддæр кæныны нысанæн, уый кæронмæ бакæнын, цæмæй адæм банкъарой æцæгдæр уыцы æххуысы нысæнттæ»,- загъта Тыбылты Леонид.

P8081173.JPG
Тыбылты Леонид ноджыдæр раарфæ кодта Уæрæсейы Федерацийы Хицауады Сæрдар Дмитри Медведевæн йæ балцы фæдыл æмæ баныфсæвæрдта, ацы ныхас дæр кæй фæахъаз уыдзæн æмбæлон плантæ æмæ программæтæн. Адæм æмæ сæ цард нывондæн чи æрхаста, уыдон тыххæй, хæдбардзинад æмæ паддзахаддзинад фидар кæныны нысанæн.
«26 августы мах нысан кæндзыстæм нæ республикæйы Хæдбардзинад расидыны бон. Уыцы указ бафыст æрцыд сæрмагондæй дæ къухæй. Стыр бузныг дын уый тыххæй æмæ дарддæр дæр Ирыстоны хæрзæбонæн цы аразут, уый тыххæй»,- дзырдта Республикæйы сæргълæууæг.
Дмитри Медведев банысан кодта, абон Хуссар Ирыстонæн сæрмагонд бон кæй у.
«Цыппар азы размæйы варварон агрессийы рæстæджы Уæрæсейы бахъуыд ахæм уынаффæ райсын, цæмæй баххуыс кодтаид чысыл Хуссар Ирыстонæн, агрессорæн та радтаид ныхкъуырд. Уый арæзт æрцыд рæстæгыл, тард æрцыд гуырдзиаг æфсад. Уыцы бон мæн дæр сæрмагондæй райсын бахъуыд къорд вазыгджын уынаффæйы, уыцы нымæцы, æфсæддон уынаффæтæ. Æмæ, сæйраджыдæр, уыдон æрхастой сабырад Ирыстоны зæхмæ, æмæ баззайдзысты нæ адæмты историйы.
Ныртæккæ нæ разы лæууы æндæр хæстæ, уыдоныл æз дзырдтон мæ раздæры балцы, ныр та, дæуæн, куыд ног къухдариуæггæнæг, афтæ. Сæйраг цы у? - цард æрбиноныг кæнын. Арæзт æрцыд цъус. Абон нæ иумиаг хæс у цард æрбæстон кæнын æмæ бирæ æмбæстагон нысаниуæджы объекттæ саразын. Æфсæддон фады-джы æппæт дæр хорз у, арæзт æрцыд æфсæддон базæтæ, хъахъхъæнынц Хуссар Ирыстоны адæмы сабырад. Æххуыс кæнынц чысыл æмæ хæдбар паддзахады райрæзтæн. Фæлæ æмбæстагон цард æфсæддон базæтæй скъуыддзаг нæ цæуы. Нæ хæс у фылдæр цæрæн хæдзæрттæ саразæм, фæндæгты уавæр æрбæстон кæнæм, инфраструктурæйы объекттæ саразæм иумиаг тыхтæй.
Æз æрцыдтæн ардæм мæ коллегæтимæ Президенты администраци æмæ Хицауады уæнгтимæ, цæмæй æрдзурæм республикæйы социалон-экономикон райрæзты практикон къахдзæфтыл. Мæ хъуыдымæ гæсгæ, ног командæйæн ис тых, æмæ, сæйраджыдæр, Хуссар Ирыстоны адæмæй цы мандат райстат, уый. Уæрæсе дарддæр дæр æххуыс кæндзæн æмæ хъахъхъæндзæн Хуссар Ирыстоны адæмы. Ныфс мæ ис æмæ иумиаг тыхтæй аскъуыддзаг кæндзыстæм æрмæст вазыгджын геополитикон хæстæ нæ, фæлæ конкретон сабырадон хæстæ, кæцытæм æнхъæлмæ кæсынц, абон, 8 августы фæзуатмæ цы адæм æрæмбырд, уыдон. Мæнæн æхсызгон у сæ уæздан мидбылхудт æмæ хæларадон ахаст»,- загъта Дмитри Медведев.
КЪÆБУЛТЫ Маринæ