Nog adres

РЕСПУБЛИКÆ ХУССАР ИРЫСТОНЫ ХИЦАУАДЫ УЫНАФФÆ

Дзауы районы фосыл тæссаг фадниз ма апарахат кæныны фæдыл мадзæлтты тыххæй
Дзауы районы Ерманы хъæуы фосы фадниз(ящур) кæй фæзынд, уый нысанæн æмæ æнæхъæн Республикæйы территорийыл апарахатæй тас кæй у, уый тыххæй Республикæ Хуссар Ирыстоны Хицауад уынаффæ кæны:
1. Карантин æвæрд æрцæуæд Дзауы районы Рукъы регионы дыууæ мæйы æмгъуыдмæ.
2. Едысы хъæуы æвæрд æрцæуæд æдзухон карантин æмæ дзы арæзт æрцæуæд дезинфекцион гæрæн.
3. Ма цæуæд уагъд удæгас фосы æмæ хъæууонхæдзарадон продуктты æрбаласт æмæ аласт Дзауы районы Рукъы регионыл.
4. Финансты министрад самал кæнæд æхцайы фæрæзтæ 51150 сомы бæрц, республикæйы ветеринарон службæты хъæуæг дезинфекцион буарадтæй æмæ сæрмагонд дарæсæй сифтонг кæныны тыххæй, санаци ауадзын æмæ æрвылбон дезинфекцион гæрæнты дезинфекцион буарадтæй ифтонг кæныны тыххæй.
5. Республикæйы ветеринарон службæ ногæй ауадзæт фосы вакцинаци, уымæй размæйы вакцинаци бахынцгæйæ.
6. Ацы Уагæвæрдыл контроль бахæс чындæуæд Республикæ Хуссар Ирыстоны Хъæууон хæдзарады министрады ветеринарийы управленийы хистæрæн (Лолаты В. К.)
Республикæ Хуссар Ирыстоны Хицауады Сæрдар Хуыгаты Ростислав
2012 азы 1 август