Nog adres

Ног бафæлвæрд не 'мбæстæгты ссæрибар кæныныл

P7261154.jpg
Дарддæр кæнынц инциденттæ развæлгъау аиуварс кæнын æмæ сæм хъусдард здахыны фæдыл механизмты фæлгæтты фембæлдтытæ. Радон планон фембæлд уагъд æрцыд Хуссар Ирыстон æмæ Гуырдзыстоны 'хсæн паддзахадон арæныл, Ергнеты хъæумæ хæстæг. Фембæлды хайад райстой Хуссар Ирыстон, Уæрæсейы Федераци, Гуырдзыстон, ЕÆÆО æмæ Евроцæдисы минæвæрттæ.
Фембæлды цы фарстатыл дзырд цыд, уыдоны 'хсæн, кæй зæгъын æй хъæуы, уыд Цхинвалы районы Зардиаты хъæуы абоны уавæр. Куыд зонæм, афтæмæй гуырдзиаг полициæгты пост æрбахастæуыд дыууæ бæстæйы 'хсæн арæнмæ хæстæг æмæ сæвзæрын кодта æввахс цæрджытæн тæссаг æмæ æндыгъд уавæр.
Хуссар Ирыстонæй механизмты куысты делегацийы сæргълæууæг, постконфликтон хъаугъатæ æрбæстон кæныны фæдыл РХИ-йы Президенты æххæстбарджын минæвары хæдивæг Гаглойты Хох куыд банысан кодта, уымæ гæсгæ гуырдзиаг фарс фехъусын кодта, зæгъгæ, уыдон гаранти дæттынц уыцы регионы цæрджыты æдасдзинад бахъахъхъæнынæн. Ацы фарсты фæдыл хуссарирыстойнаг фарс ногæй ницыуал фехъуыста гуырдзиаг фарсæрдыгæй, 1 июль æмæ 14 июлы цы æнæрадон фембæлдтытæ уагъд æрцыд, уым цы загъдæуыд, уымæй дарддæр.
Уымæ гæсгæ хуссарирыстойнаг фарсæн кæд алы уавæртæ дæр уыд уавæр фæхуымæтæгдæр кæныны фæдыл, уæддæр нæ ары хъарутæ хуымæтæг логикон архайдтытæн полициæгты пост йæ бынатмæ ахæссын æмæ уавæр уымæй æрсабыр кæнын.
«Дзырд ма цыд гуманитарон фарстатыл. Хуссар Ирыстоны фарс фехъусын кодта, цæмæй фембæлды хайадисджытæ, кусой Хуссар Ирыстоны паддзахадон арæнмæ æввахс сæвзæргæ фарстатæ аскъуыддзаг кæныныл.
Бæрæг размæцыды нысæнттæ ис, гуырдзиаг ахæстæтты цы ирон æмбæстæгтæ ис, уыдон ссæрибар кæныны хъуыддаджы. Цæуы æмбæлон куыст уыдон фæдыл æмæ нæ ныфс ис, æввахс рæстæджы конкретон фæстиуджытыл кæй дзурдзыстæм», - банысан кодта Хох.

Гуырдзиаг фарс банысан кодта, не 'мбæстæгтæй сæ ахæстæтты чи ис æмæ сæрибар чи æрцæудзысты, уыдоны номхыгъд. Уымæ гæсгæ хуссарирыстойнаг фарс максималонæй архайдзæн йе 'мбæстæгты ссæрибар кæныныл.
Гаглойты Хох ма банысан кодта, зæгъгæ, цы æртæ гуырдзиаг æмбæстаджы æрцыдысты сæрибар, уый арæзт æрцыд амнистийы фæлгæтты.
«Уымæй Хуссар Ирыстон равдыста, Республикæ Хуссар Ирыстоны закъоны раз алчидæр æмхуызон кæй у, нацимæ нæ кæсгæйæ. Гуырдзыстойнаг делегацийы уæнгтæ стыр аргъ скодтой ахæстæтты ссæрибар кæныны хъуыддагæн æмæ мæ ныфс ис, ацы факт хынцыд кæй цæудзæн, Хуссар Ирыстонæй Гуырдзыстоны ахæстæтты чи ис, уыдон ссæрибар кæныны фарсты дæр.
Уымæй дарддæр ма делегацийы механизмты куысты хуссарирыстойнаг сæргълæууæг фехъусын кодта, рæгъмæ кæй рахастой æбæрæгæй сæфт æмбæстæгты фарст дæр.
«Хуссар Ирыстоны фарсæрдыгæй банысан æрцыд æбæрæгæй сæфт æмбæстæгты æрцахсыны уавæртæ æмæ ма нын зындгонд цы ис, уыдæттæ. Гуырдзиаг фарс ацы фарсты фæдыл ницахæм бæрæггæнæнтæ нæ бахынцыдта», - загъта Хох.
Инциденттæ ма æруадзын æмæ сæ рæстæгыл аиуварс кæныны фæдыл механизмты фæлгæтты радон планон фембæлд уагъд цæудзæн ацы аз сентябры мæйы кæрон.
КЪÆБУЛТЫ М.