Nog adres

Нæ зынаргъ Зауыр!

Нæ зынаргъ Зауыр!

Хуссар Ирыстоны Фысджыты цæдис дын зæрдæбынæй арфæ кæны, дæ райгуырдыл 75 азы кæй сæххæст, уый цытæн. Дæ сабибонты, стæй де ‘взонджы бонты дæр цъус фыдæбæттæ нæ бавзæрстай, уæддæр дын бантыст алы ныхдурты сæрты ахизын, царды аккаг бынат бацахсын æмæ дæ юбилейы сæргъ сæрыстырæй слæууын.

Ды, Ирыстоны скъолаты кусгæйæ, ирон сабиты хъомыл кæныныл, раст фæндагыл сæ бафтауыныл цы хъару бахардз кодтай, уый раппæлыны аккаг у; ирон мыхуыры фæрæзты – Ленингоры районон газет «Ленинон», областон газет «Советон Ирыстон» (фæстæдæр республикæйон газет «Хурзæрин»-ы), чингуыты рауагъдад «Ирыстон»-ы, иу æмæ ссæдз азы журнал «Фидиуæджы» бæрнон нымæрдарæй цы удыхъæд равдыстай, уыдон мыхуыры кусджытæм нымад сты, фæлæ дæ хъару, дæ курдиат иууыл ирддæрæй ирон прозæйы жанры кæй разынд, уый æгас Ирыстон дæр зоны.

Цыфæнды уавæрты дæр дæ зонды тых, дæ курдиат никуы ‘вгъау кодтай æмæ не ‘вгъау кæныс не ‘мдугон ирон адæймаджы удыхъæд, не ‘мрæстæгонты зæрдæйы уаг, куыд у, афтæмæй равдисынæн æмæ уый дæ къухы æфтгæ дæр кæны. Ууыл дзурæг сты дæ радзырдтæ, уацаутæ æмæ романты чингуытæ: «Гакъон фæндагыл», «Сосойы зарæг», «Цæр алкæй тыххæй», «Сау суадон», «Фæстаг маймули», «Æлгъыст хæдзар», «Зæрдæйы зæлланг», «Царды фæлтæртæ», «Хуры фырт» æмæ æндæртæ.

Дæ цард æмæ де сфæлдыстадыл стыр фæд ныууагъта, фæстаг ссæдз азы Ирыстоны хуссар хайæн нæ фыдбоны сыхæгтæ æнæаххосæй цы фыдмитæ фæкодтой, уыцы трагеди. Ныр цæрæм хæдбар паддзахады æмæ дæ къухы ноджы бирæ æнтыстытæ цы бафта, уыцы амонд дæ уæд.

Фæрнджын у, нæ уарзон хæлар!

Хуссар Ирыстоны Фысджыты цæдис